Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 392,024 Auteur: Raimbaut de Vaqueiras Genre: Canso Numero: XXX

No m'agrad'iverns ni pascors

		[CANÇÓ]
I	1	No m’agrad’iverns ni pascors,
		ni clar temps ni fuelhs de gaurricx,
		quar mos enans me par destricx
		e totz mos magers gaugz dolors;
	5	e son maltrag tug mei lezer
		e dezesperat mei esper;
		e si·m sol amors e dompneys
		tener guay plus que l’aigua’l peys;
		e pus d’amdui me sui partitz,
	10	cum hom eyssellatz e marritz,
		tot’autra vida·m sembla mortz
		e tot autre joy desconortz.
II		Pus d’amor m’es falhida·l flors
		e·l dous frug e·l gras e·l espicx,
	15	don jauzi’ab plazens predicx,
		e pretz m’en sobrav’et honors,
		e·m fazia entre·ls pros caber,
		era·m fai d’aut en bas chazer;
		e si nom sembles fols esfreys,
	20	anc flama tan tost non s’esteys
		qu’ieu for’esteyns e relenquitz
		e perdutz en fagz et en digz,
		lo jorn que·m venc lo desconortz
		que no·m merma, cum que m’esfortz.
III	25	Pero no·m comanda valors,
		si be·m sui iratz et enicx,
		qu’ieu don gaug a mos enemicx
		tan que·n oblit pretz ni lauzors;
		quar ben puesc dan e pro tener,
	30	e sai d’irat jauzens parer
		sai entre·ls latis e·ls grezeis:
		e·l marques, que l’espaza·m ceis,
		guerreye lai blancs e droguitz,
		et anc pus lo mons fo bastitz,
	35	no fes nulha gens tan d’esfortz
		cum nos, quan Dieus nos n’ac estortz.
IV		Belhas armas, bos feridors,
		setges e calabres e picx,
		e traucar murs nous et anticx,
	40	e venser batalhas e tors
		vey et aug, e non puesc vezer
		ren que·m puesc ad amor valer;
		e vauc sercan ab rics arneys
		guerras e coytas e torneys,
	45	don sui, conquerenz, enrequitz;
		e pus joys d’amor m’es falhitz,
		totz lo mons me par sol uns ortz,
		e mos chans no m’es mais conortz.
V		Lo marques vey honrat e Sors
	50	e Campanes e·l coms Enricx,
		Sicar, Montos e Salanicx,
		e Constantinople socors,
		quar gent sabon camp retener,
		e pot hom ben proar en ver;
	55	qu’ancmais nulha gent non ateys
		aitan gran honor apareys
		per bos vassals, valens, arditz,
		e nostr’emperi conqueritz;
		e Dieu trameta nos esfortz
	60	qu’elh se trai’a cap nostre sortz.
VI		Anc Alixandres no fetz cors,
		ni Karles ni·l reys Lodoycx
		tant honrat; ni·l coms N’Aimericx,
		ni Rotlan ab sos ponhedors,
	65	no saubron tan gen conquerer
		tan ric emperi per poder
		cum nos, don pueia nostra leys;
		qu’emperadors e ducx e reys
		avem fagz, e castels garnitz
	70	pres dels turcx e dels arabitz;
		et ubertz los camis e·ls portz
		de Brandis tro al bratz Sanh Jortz.
VII		Doncx que·m val conquitz ni ricors?
		qu’ieu ja·m tenia per plus ricx,
	75	quant era amatz e fis amicx,
		e·m payssia cortes’amors;
		n’amava mais un sol plazer
		que sai gran terr’e gran aver;
		qu’ades on plus mos poders creys,
	80	n’ai maior ir’ab me mazeis;
		pus mos Belhs Cavaliers grazitz
		e joys m’es lunhatz e faiditz,
		don no·m venra jamais conortz;
		per qu’es mager l’ira e plus fortz.
VIII	85	Belhs dous Engles, francx et arditz,
		cortes, essenhatz, essernitz,
		vos etz de totz mos gaugz conortz,
		e quar viu per vos fatz esfortz.
IX		Per vos er Damas envazitz,
	90	e Jerusalem conqueritz,
		e·l regnes de Suria estortz,
		que·ls turcx o trobon en lur sortz.
X		Los pelegris perjurs faiditz,
		que nos an sai en camp gequitz,
	95	qui los manten en corts es tortz;
		que quascus val meins vius que mortz.
		(Text de Raynouard)