Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Code: 261,001a=248,040 Auteur: Jaufre de Pon , Guiraut Riquier Genre: Tenso Numero: XIV

Guiraut Riquier, diatz me

I		Guiraut Riquier, diatz me:	[Jaufre]
		per cals gens es pus grazitz
		domney segon vostr'essien?
		Car say es mal aculhitz,
	5	c'a penas truep que·l mantenha,
		ans a de contraris tans,
		que dels destricx cascus pessa,
		per que notz als fis amans.
II		Senh'en Jaufre, be·s cove	[Guiraut]
	10	que·us sia tost per mi di<t>z
		mos semblans, on se mantê
		domneys pus ab faitz chauzitz.
		Entre·ls Catalas mais renha
		domneis ab faitz agradans,
	15	c'usquecx ab joy si adressa
		fazen totz faitz benestans.
III		Guiraut, ben volgra fos say	[Jaufre]
		aquel bos costums mest nos,
		qu'e[s] la res que plus mi play;
	20	car mot estau temeros,
		si que no·us aus dir ni faire
		endreg d'amor mon plazer,
		car qui mon joy conoisia
		tost poiria dechazer.
IV	25	Senh'en Jaufre, ben eschay,	[Guiraut]
		qui es verais ni amoros,
		que per s<e>la que·l ten jay
		sia temens e ginhos;
		c'amor non pot durar gaire,
	30	pus per motz se pot saber,
		per que selan tota via
		deu hom son joy conquerer.
V		Guiraut, anc nulh fis amaire	[Jaufre]
		non poc pus fin cor aver,
	35	e si Jolivetz sabia
		mon joy, deuria·l plazer.
VI		Senher, no fai a retraire,	[Guiraut]
		qui a d'amor son voler,
		c'ap selar creys hom tot dia
	40	d'amor joy e bon saber.