Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 335,067 Auteur: Peire Cardenal Genre: Chanson religieuse Numero: XXXV

Un sirventes novel vuelh comensar

		[SIRVENTÈS]
I	1	Un sirventes novel vuelh comensar
		que retrairai al jorn del jutjemen
		a selh que·m fetz e·m formet de nien;
		si·l me cuia de ren ochaizonar,
	5	e si·l me vol metre en la diablia,
		ieu li dirai: «Senher, merce no sia,
		qu’el mal segle trebaliey totz mos ans
		e gardetz me, si·us plai, dels turmentans».
II		Tota sa cortz farai meravilhar,
	10	quant auziran lo mieu plaideyamen;
		qu’ieu dic qu’el fai ves los sieus fallimen,
		si·l los cuia delir ni enfernar;
		quar qui pert so que guazanhar poiria,
		per bon dreg a de viutat carestia;
	15	qu’el deu esser dous e multiplicans
		de retener sas armas trespassans.
III		Ja sa porta non degra vedar,
		e sans Peires pren hi gran aunimen,
		quar n’es poitiers, mas que·y intres rizen
	20	quascun’arma que lai volgues intrar,
		quar nulha cortz non er ja ben complia
		que l’uns en plor e que l’autres en ria,
		e sitot s’es sobeirans reys poyssans,
		si no·ns obre, sera li·n faitz demans.
IV	25	Los diables degra dezeretar
		et agra en mais d’armas pus soven,
		e·l dezeret plagra a tota gen
		et el mezeis pogra s’o perdonar.
		Tot per mon grat, totz los destruiria,
	30	pus tug sabem qu’absolver s’en poiria;
		bel senher Dieus, siatz desheretans
		dels enemicx enoios e pezans.
V		Ieu no mi vuelh de vos dezesperar,
		ans ai en vos mon bon esperamen;
	35	per que devetz m’arma e mon cors salvar,
		e que·m valhatz a mon trespassamen;
		e far vos ai una bella partia
		que·m tornetz lai d’on muec lo premier dia,
		o que·m siatz de mos tortz perdonans;
	40	qu’ieu no·ls feira si no fos natz enans.
VI		S’ieu ai sai mal, et en yfern ardia,
		segon ma fe, tortz e peccatz seria;
		qu’ieu vos puesc be esser recastinans,
		que per un ben ai de mal mil aitans.
VII	45	Per merce·us prec, dona sancta Maria,
		qu’ab vostre filh nos siatz bona guia,
		si que prendatz los paires e·ls enfans
		e·ls metatz lay on esta sanhs Joans.
		(Text de Raynouard)