Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 323,018 Auteur: Peire d'Alvernha Genre: Vers Numero: LXXXIX

Gent es, mentr' om n'a lezer

I	1	Gent es, mentr' om n'a lezer,
		s'enans de son mielhs a faire,
		que, quan s'aizin'a·l cuidaire,
		tal hor' es larcs del voler,
	5	e qui enans es avertitz
		que l'aguaitz li sia yssitz,
		non es ges del tot muzaire.
II		Contr'aiso deu aparer
		en cuy sens es alberguaire,
	10	que sciensa no pretz guaire,
		s'als ops non la vey valer;
		doncs ar er de mi sentitz
		lo sabers don sui techitz,
		s'er fis o mesclatz de vayre.
III	15	Qu'el segl'ai fag mon plazer
		tan que·n suy de trop peccaire;
		et ar agrada·m n'estraire,
		pus dieus pro·m n'a dat lezer;
		qu'esser pot hom descauzitz,
	20	e non es ops n'an delitz
		per oltra-cujat vejaire.
IV		Pois dieus so·m laissa vezer
		en que puesc esser miraire
		de mo mielhs e·l sordeis raire:
	25	hon hom plus a de saber?
		hon mager sens l'es quesitz,
		et aquelh par plus falhitz
		qu'a sos ops n'es enguanaire.
V		Mas si.n sabi'a dieus, ver!
	30	be sai; for'encar confraire
		de ioven et enquistaire.
		sil ric cuy degra cazer
		en grat, fan vis esbauditz,
		mas sí·l fals segl'es mestitz
	35	que·l fait son pauc contra·l brayre.
VI		E mentr'usquecx pot querer
		luy qu'es vers reys e salvaire,
		totz es endreg si bauzaire,
		pus o met e non-chaler;
	40	que mager gratz n'es cobitz,
		qui ser ses colp que feritz;
		d'aitan suy ben esperaire.
VII		So feira plus a temer,
		perqu'ieu suy meravelhaire,
	45	que hom non es reguardaire,
		tro qu'es tan prosmatz al ser
		que·l iornals l'es escurzitz;
		e ss'adoncx no·l ven complitz,
		non cug que ia pueys s'esclaire.
VIII	50	Amors, be.m degratz voler,
		si negus autr' enginhaire
		mas lo deituriers iutjayre
		de vos me pogues mover,
		que per vos er'enriquitz,
	55	essaussatz et enantitz
		e pel segnor de Belcaire.
IX		Mas so non pot remaner,
		cortez' amors de bon aire,
		don mi lays esser amaire,
	60	tan m'agrad'er a tener
		lai on vol sanhs esperitz;
		huey mais el mezeys m'es guitz;
		no·us pes s'ab vos non repaire
X		Qu'ieu sai, tan ricx governaire
	65	no·m denhes en guit aver, —
		Peire d'Alvernhe so ditz —
		no, dieus, for'enquer partitz
		ni per autr'amor camjaire.