Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 342,003 Auteur: Peire Espaignol Genre: Canso Numero: CIII

Entre que·m pas e·m vauc per ombra escura

I	1	Entre que·m pas e·m vauc per ombra escura,
		e la clardat on deuria fonzar
		mos bastimens, mas non puesc cambiar
		mon coratge, si tot m'estai trop dura.
	5	quan s'es hom folhs, que si' apellatz pros
		de prim, ses sens non er ia aondos
		que ans no falh que·l fat que·l fan fallir
		assenan hom pueys fan azafreidir.
II		Selh tenc per fol qu'en trop cuydar s'atura,
	10	e vey ne mans falhir per lor cuydar;
		aissi suy yeu falhitz per sobr'amar,
		que tal dezir que de mi non a cura;
		e clami me·n de mos huelhs ambedos
		e de mon cor e d'amor, qu'en perdos
	15	mi fai amar lieys, don no·m puesc partir,
		qu'amors mi ten que·m fai aman blezir.
III		Tant es amors fortz e corals e dura
		que tot quan te, fai aissi tremolar
		cum fai lo venz la cana torneyar,
	20	que vas totz latz li fai penre baissura.
		aissi torment' amors los amoros,
		per qu'es semblans que sian saboros
		li be que fa a sselhs que·ls fa sentir,
		pus los turmens no·n pot hom devezir.
IV	25	Nulhs hom no pot d'amor penre mezura
		pus que·l nauchiers fai, quan vey lo temps clar,
		que·s cocha e corr, tro qu'es en auta mar;
		pueys vens torbatz ve·l per dezaventura.
		aissi fa amors corre vas sas preyzos
	30	selh que troba d'amar voluntados,
		e quan l'a pres, fa·lh mays turmens sufrir,
		no sofre selh qu'es en cap de murir.
V		Cum lo leos fai amors sa tezura,
		qu'entorn bosc fa trassa, quan deu cassar,
	35	sal un portel, en que no vol tocar;
		aqui·s pauza et esta et endura,
		entro que pren. aissi fa las ginhos
		amors, en que pren totz, los mals e·ls bos,
		si que pauc son selh que·s podon gandir;
	40	pueys ses merce no se·n pot us iauzir.
VI		Tot atressi cum l'estrus per natura
		que de son huou gardan lo fai coar,
		me fa, dompna, vostre plazen esgar
		naysser del cor sospirs d'aital figura
	45	que·l belh semblan e las gentas faissos
		e·l cortes dich per qu'ieu suy enveyos,
		me venon si tot dreg al cor ferir
		que·m fai lo iorn cent vetz viur' e morir.
VII		Belh Dous-Esgar, de merce e de vos
	50	esper que·m sia faitz bos guiardos
		e que·m leugetz lo turmen e·l dezir
		que·m don'amors per vos, que·m faitz languir.