Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 389,040 Auteur: Raimbaut d'Aurenga Genre: Canso Numero: CXV

Una chansoneta fera

I	1	Una chansoneta fera
		voluntiers levet'a dir,
		don tem que m'er a murir,
		qe far l'ai tal, qui sen sela,
	5	ben la poira leu entendre;
		si tot s'es en aital rima,
		li mot seran descubert,
		alques de razon deviza.
II		Bo·m sap, quar tan m'apodera
	10	mos cors que non puesc sufrir
		de mon talan descobrir,
		qu'ades pueg a plena vela,
		cuy que veja ios dessendre,
		per que no y puesc nul' escrima
	15	trobar, tant ai trop suffert,
		de far parer ma conquiza.
III		Pus ma dona m'es tan vera,
		trop mielhs qu'ieu no·lh sai grazir,
		s'ieu quier als, tostemps m'azir,
	20	a dieu, ni ia·n met chandela,
		o·m fassa que be m'an pendre
		per la gola ad una sima.
		pro m'a dat, si lieis no pert,
		dieus e paguat a ma guiza.
IV	25	Ben saup lo mel de la cera
		triar e·l mielhs devezir
		lo iorn que lieis poc cauzir.
		pus cazens clardatz d'estela
		apar, no·s fai a contendre
	30	beutatz d'autra, si be·s lima,
		. . . . . . . . . . . . . . . .
		. . . . . . . . . . . . . . . . . .
V		Dompna, quan mi colc al sera,
		la nueg, e tot iorn cossir
	35	co·us pogues en grat servir.
		quant hie·m pes qui·m fer ni·m pela,
		no·m pot far en als entendre
		mos cors; de gaug salh e grima,
		tant ai en vos mon cor sert
	40	e ma voluntat assiza.
VI		Dompna, si no.s alezera
		mos cors lai on ieu dezir,
		res pus tost no·m pot aucir;
		sí·m tarza pessatz de tela
	45	al cor qu'om no·s pot defendre.
		que·l vida m'es aitan prima,
		soven ai gaug; e·m n'espert
		e·m pes: mala l'ai enquiza.
VII		Non ai fag tan long' espera
	50	qu'aissi me·n degues marrir;
		mas us iorns m'es vis que·m tir
		un an. lo pretz d'una mela
		no·m tenc, si no·m pot car vendre,
		dreg, per que mos cors m'ensima,
	55	qu'ades m'estan l'uelh ubert
		vas sella part on l'ai viza.
VIII		Dieu prec, tan de mort m'escrima,
		donna, e m'aja suffert,
		tro q'ie·us embraz ses chamiza.
IX	60	Qui trob' amor ses escrima,
		ia no·m deu planher, si·m pert
		falsa ni vaira ni biza.