Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 455,001 Auteur: Uc de Murel Genre: Sirventes Numero: CXXXV

Ges, si tot bos pretz s'amorta

I	1	Ges, si tot bos pretz s'amorta
		pels fals, cuy destrenha mortz,
		mos cors no se·n desconorta
		ni·n lais chans, pus desconortz
	5	fay murir solatz e conortz
		restaura·l mal; si·m conorta
		que, si be·s pert per lurs tortz,
		ilh tenran via torta.
II		Tot so per que pretz melhura,
	10	fan baysar, can que·s melhur;
		e so per qu'el non peiura,
		eyssaus dieus, . . . . . . ;
		et an fach de malvestat mur,
		on vey que quascus se mura;
	15	e s'auzon qu'om se rancur,
		quecx dos tans se·n rancura.
III		E qui non a de que·s planha,
		desrazos es, quan se planh;
		e qui, on non deu, gazanha,
	20	non pres res aquelh gazanh;
		et hom que sos amicx gavanh'
		e·ls enemicx non gavanha,
		ges avol cor no·l sofranh,
		mas sens par que·l sofranha.
IV	25	Nulhs hom bon pretz non dezira,
		si non a de dar dezir;
		ni qui trop soven se mira,
		no·s cug qu'hom per pros lo mir;
		e selh qui ioy met en azir,
	30	tot lo mon cug que l'azira;
		e ricx ioves, mas se tir
		de dar, flac cor lo tira.
V		No·m platz qui pert ses demanda
		lo sieu e l'autruy deman;
	35	ni qui·m promet e·m fay guanda,
		no·m tenh'a mal, s'ieu li guan,
		qu'ieu no·m azaut de baron truan,
		pus ab mentir s'atruanda;
		ni qui ses benfach mi blan,
	40	ia no·s cug qu'ieu lo blanda.
VI		De baro·m platz, quan s'erguella
		vas selhs que li fan erguelh,
		e qu'onrar e servir vuelha
		e donar, qu'aital lo vuelh;
	45	e sia leyals, c'om acuelh
		pretz, sol leyaltat acuelha,
		que n'Amanieu vey que cuelh
		honor, qui que non la cuelha.
VII		Pros coms de Foys, en l'aut capduelh
	50	vos vey, on valors capduelha,
		per qu'ieu ges de vos no·m tuelh
		lauzar, qui que se·n tuelha.
VIII		Comtessa Bietris, erguelh
		no·us platz ni res, pus s'erguelha,
	55	ans es ses par, don no·m duelh,
		de beutatz, cuy que duelha.