Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,004a Auteur: Sordel Genre: Canso Numero: VI

Er encontra·l temps de mai

I	1	Er encontra·l temps de mai
		cant fuell’ e flor vei parer
		per atendre mon dever
		al meils del mon chantarai,
	5	pros donna, car no·m pois laissar,
		pois vos torn vezer, de chantar,
		mas qar no·us vei ma vida·m sembla mortz
		e chanz dolors e plazers desconortz.
II		Si tot promis qe ja mai
	10	no vos venria vezer,
		donna, eu no m’en pois tener,
		car fin’amors m’i atrai
		[e beutatz] qi·m n’a fag forzar;
		pero Assas m’es a passar,
	15	car ieu voil mais esser perjurs estortz,
		qe murir finz o viur’ab turmenz mortz.
III		Valenz domna, e qe farai?
		De vos non pos mai aver,
		si no·m degnatz retener:
	20	mal nasqei e peigz morrai;
		mas qan penz qe regnatz ses par
		de beutatz e de fin pretz car
		a totz bos aibs, don es abrics e portz,
		on piegz en trac, mos maltragz m’es conortz.
IV	25	Domna, ‘l mals qe piegz me fai
		es qar non ai dreg lezer
		qe·us vis sovent ni poder
		de servir vostre cors gai:
		mas qi fa gent zo qe pot far
	30	deu ben del plus [merce trobar:
		merce trob ieu e] merces fassa fortz
		mos frevols fagz pos del poder m’esfortz.
V		Adregz cors plazenz, tan ai
		e vos servir mon voler,
	35	q’eu fug zo que pogr’aver
		per zo qe ja non aurai,
		qar enver vos voil mescabar
		anz q’a null’autra gazagnar,
		qar tals mescabs m’es gazanz e deportz
	40	e jois d’aillors destrics e desconortz.
VI		Douc’ enemia, en vos amar
		soi tan ferm lassatz ses cor var,
		qe desfermar no m’en pot dreigz ni tortz,
		ni jois d’autra [ni] de vos desconortz.