Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Code: 234,015 Auteur: Guilhem de Saint Leidier Genre: Canso Numero: I

Per Dieu, Amor, en gentil luoc cortes

		G. DE SANT DESDIER (f. 73).
cxxxiij.
I	1	Per Dieu, Amor, en gentil luoc cortes
		Saupest assir tot mon cor e mon sen,
		Per qu’ieus o dei ben grazir lonjamen
		Que nom cugera esdevenir pogues,
	5	Que la gensor m’aves fait abellir
		Que sia el mon en fait et en semblant.
		Tant es bella qu’ieu hi conocs mon dan,
		C’ab enveya cre quem n’er a murir.
II		Ben sai del mon que s’a chauzir agues
	10	Qu’en leis chauzira, sis feran d’autres cen ;
		Per qu’ieu am mais de leis lo lonc aten
		Que d’autra ren que donar mi pogues.
		Mais trop ai mes autamen mon dezir,
		Per c’ai paor qu’elam torn en soan,
	15	Car ges non puesc capdelar mon talan
		C’ades non vuelha lo miels qu’el mont se mir.
III		Ric joy e gran ai volgut, e defes
		Ab cortezia montan son pres valen,
		Trobat, com deu avenir qui l’anes queren :
	20	Ho qui que l’aia per mi non o dic ges,
		Qu’ieu non l’aurai ni nom deu avenir ;
		Mais non per so que si Dieus m’ames tan
		Que de s’amor agues o tant o can,
		Sol que ren n’aia pron n’ai ab lo dezir.
IV	25	Qui ’n ric’amor met son cor e son pes, (vº)
		Sitot li tarza, ric guizardon aten ;
		Qui ric seinhor pot servir lonjamen,
		Sitot bistensa, pueissas leu pren merces.
		Que mais li pot en sol un jorn servir
	30	Que nul paupre non faria d’un an,
		Per que n’aten l’onor el joi tan gran
		Qu’en ric parage ai pauzat mon albir.
V		Ben la preguara, si a leis ar plagues,
		Quem consentis un celat parlamen.
	35	Car s’ieu la vauc vezer tot a prezen
		Diran mesonjas maint envios plaides,
		C’aital semblans fai amics departir,
		Et ans del fag on cascuns a pueis dan :
		E si fossan acordat des aban
	40	Abdui se pogran ab mens de bruit partir.
VI		D’una ren fan domnas gran nesies :
		C’ab lonc enquerre fan lur joi conoissen.
		Cant hom las pregua, et ill n’auran talen
		Et l’es vejaire que ben a s’amor mes,
	45	Per qu’en fan plus de paraulas auzir ?
		C’asatz son lo d’envios devinan
		Que dizon mais mil aitans que non es,
		C’ab lur enuey an fait mant joi partir.
VII		Chansoneta vai m’a mon Bertran dir
	50	Quel prec quet fassa al sieu Bertran auzir.