Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 248,022 Auteur: Guiraut Riquier Genre: Pastorela Numero: XIII

D'Astarac venia (1276)

I		D'Astarac venia,
		L'autrier, vas la Ylla
		Pel camin romieu,
		E pres de la via,
	5	Desotz una trilla,
		Vi, e no·m fon grieu,
		La bergeira mia
		Que sec ab sa filha.
		Conoc me tan lieu,
	10	Ris, si be·s planhia,
		E·s det meravilha,
		Comandet s'a Dieu.
		Tost dissendi yeu:
		Ylh fon se levada,
	15	Tornet el loc sieu,
		Quan l'aic saludada.
II		Vi la fort camjada
		Vas que ja fon bella;
		Dissi: « Don vinetz? »
	20	— « Senher, tan senhada
		Suy, de Compostella
		Que·us o conoyssetz ».
		— « Pus vos ai trobada,
		Comtatz me novella
	25	De lai, si sabetz ».
		— « Senher, vas Granada
		Va·l Reys de Castella;
		Doncx tost lai tenetz! »
		— « Dona, que dizetz?
	30	Qu'ieu no crey que fassa ».
		— « Senher, mout falhetz
		Non seguen sa trassa ».
III		— « Enquer no·us espassa,
		Fi·m yeu, la maneira
	35	De mi a ehuflar? »
		— « Senhe· N Guiraut, lassa,
		Riquier, no·m bergeira
		Suy d'aquest chantar ».
		— « De mi penre·us plassa
	40	L'alberga enteira
		Anueg, e·l jogar ».
		— « Senher, per Dieu, massa
		M'avetz per leugeira:
		No·us cal covidar! »
	45	— « Dona, ges no·m par
		Ajatz de mi cura ».
		— « Senher, non d'amar,
		Ni no·m fa frachura ».
IV		— « Tot farai rancura
	50	De vos, quar m'es brava,
		Hueymais, en chantan ».
		— « Senher, per drechura,
		De Dieu, si·us membrava,
		Fosson vosfcre chan! »
	55	— « Dona, ges vilhura
		Non ai, qui·m jutjava
		Dreg, que·m des soan ».
		— « Senher, ab mezura
		Ges bos sens no·us trava,
	60	Ni canas, ni an ».
		— « Dona, per semblan,
		Mal me cujatz dire ».
		— « Senher, no·us ten dan:
		Tant es bos sufrire! »
V	65	— « Pro femma, que·us tire
		Non ai dig encara;
		Per que·m dizetz mal? »
		— « Senher, ai dezire
		Tenessetz per amara
	70	Via temporal ».
		— « Per ren no m'albire
		Qu'om veya la clara,
		Per sermon aital ».
		— « Senher, mo martire
	75	Doblatz parlan ara,
		Et a vos no val ».
		— « Per totz temps vos sal
		Dieus! Pus no·us diria ».
		— « Senher, no m'en cal.
	80	E nom de Dieu, via! »