Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 174,004 Auteur: Gavaudan Genre: Pastorela Numero: III

Dezamparatz, ses companho

I		Dezamparatz, ses companho,
		E d'amor luenh del tot e blos,
		Cavalgava per un cambo,
		Marritz e tristz e cossiros,
	5	Lonc un bruelh, tro joys mi retenc
		D'una pastoressa que vi,
		Per qu' es mos joys renovellatz
		Quam mi remembre sas beutatz
		Qu'anc pucyssas d'autra no·m sovenc.
II	10	Tost dissendei sobre· l sablo,
		E vinc vas lieys do sautz coytos.
		Elha·m ders un pauc lo mento
		Ab un dos ris ferm amoros,
		E·m dis: « Senher, cossi·us avenc
	15	Que·us trastornassetz sai vas mi?
		Quo·us etz tan de mi adautatz?
		Qu'ieu no say que s'es amistatz,
		Per que.m luenh de vos e m'estrenc ».
III		— « Toza, joys mi dona razo
	20	Per qu'ieu suy sa vengutz a vos:
		Quan me mostretz vostro faisso
		Sobre totz jauzens fuy joyos;
		Per que mon cor fortz e destrenc
		Al vostr' amor, vas cuy m'acli;
	25	E sia volgutz et amatz
		Lo mieus joys e·l vostre, si·us platz,
		Que ja mais no rompa ni trenc ».
IV		— « Senher, si m'amistat vos do,
		Yen aurey nom Na Malafos,
	30	Qu'ieu n'esper melhor guizardo
		D'autre, que cug qu'en breu m'espos.
		Dar vos ai d'est cairelh que tenc;
		E tornatz en vostre cami,
		Qu'ab autras vos etz ensajatz,
	35	Per semblan, don etz galiatz,
		Falsas, que fan ric joy sebenc ».
V		— « Amiga, no·us dic oc ni no
		De las falsas ab cor ginhos,
		Tan me platz do vos e·m sap bo
	40	Que totz mals, da ver, m'en es pros;
		En qual que·us vulhatz vos, o prenc,
		Que ieu vos plevisc e·us afi
		Que vostres suy endomenjatz;
		E faitz de mi so que·us vulhatz,
	45	Neys lo cor traire ab un brenc ».
VI		— « Senher, qui messonjas a pro
		A ssemblan de ver non es tos;
		La saviez' a Salamo
		Aondera, s'Amors no fos,
	50	Que mur e forsa e palenc
		Fe de sen, et un franh bassi
		No·l valc, quan fo apoderatz;
		E pus elh ne fo enganatz,
		Guardatz en vos so qu'ieu no prenc ».
VII	55	— « Amiga, ab autr' ocbaizo
		Mi tornatz mon joy sus dejos,
		Que ja non er ni anc no fo
		Qu'Amors no sia bon' als bos:
		Per qu'ieu de bon amar no·m fenc
	60	Que·m don al cor joy clar e fi
		De vos, e prec merce m'ajatz,
		O·m metrey, si m'o alongatz,
		Hermitas el Pueg de Messenc ».
VIII		— « Senher, ja prezic ni sermo
	65	Non aya mai entre nos dos:
		Si m'es amicx, amiga·us so;
		Quar tan n'etz lecx et enveyos,
		Yeu gieti foras et espenc
		E de mon cor erguelh comgi.
	70	Tot aissi cum vos desiratz
		Et mos joys al vostre privatz,
		Que ses joy no valh un arenc ».
IX		— « Amiga, ab tant ey assatz:
		Per mil vetz s'es mos joys doblatz
	75	Quar en la vostr' amor atenc ».
X		— « Senher, e vos non o digatz,
		Sitot dur cor adomesjatz,
		Als parliers, gola de « las tenc! ».