Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Code: 156,004=097,002 Auteur: Falquet de Romans , Blacatz Genre: Échange de coblas Numero: X

En chantan voill qe·m digatz

I	1	En chantan voill qe·m digatz,
		segn’En Blancatz,
		se vai l’emperaire
		vas la terra don Deus fon natz,
	5	vos, q’en pessatz
		o q’en cujatz faire ?
		q’eu volrai retraire
		zo qe·us n’er vejaire,
		se·l viage vos agenza
	10	o si·os platz la remanenza ;
		c’ancor non a gaire
		qe·il contessa de Proenza
		diç qe per sa entendenza
		eratz gais e chantaire.
		En Blancatz li respondet en aqesta cobla :
II	15	En Falqet, be o sapçatz
		q’eu sui amatz
		et am ses cor vaire
		lei en cui es fina beutatz
		e gais solatz ;
	20	q’ela·m po desfaire
		e, se·s vol, refaire,
		qe de prez es maire ;
		ab sen et ab conoissenza
		et ab bels dichz de plaisenza,
	25	sap cor de cors traire ;
		eu farai ma penedenza
		zai, antre mar e Durenza,
		apres del seu repaire.