Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 106,015 Auteur: Cadenet Genre: Pastorela Numero: V

L'autrier, lonc un bosc fullos

I		L'autrier, lonc un bosc fullos
		Trobiey en ma via
		Un pastre mout angoyssos
		Chantan; e disia
	5	Sa chansos: « Amors,
		Ye·m clam dels lauzenjadors,
		Car la dolors
		Qu'a per elhs m'amia
		Mi fai piegz que·l mia ».
II	10	— « Pastre, lauzengier gilos
		M'onron chascun dia,
		E dizon q'ieu suy joyos
		De tal drudaria,
		Don mi creys honors
	15	E non ay autre socors.
		Pero·l paors
		Que ilh n'an seria
		Vertatz, s'ieu podia. »
III		— « Senher, pus lo fals ressos
	20	De lor gelozia
		Vos platz, pauc etz amoros;
		Quar lor fellonia
		Part mans amadors,
		Qu'ieu pert midons pels trachors;
	25	Et es errors
		E dobla folhia
		Qui en lor se fia. »
IV		— « Pastre, yeu no suy ges vos,
		Que·l maritz volria
	30	Bates midons a sazos,
		Qu'adoncx la·m daria!
		Quar per aitals flors
		Las an li gelos pejors,
		C'ab las melhors
	35	Ten dan vilania
		E y val cortezia. »