Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,026 Auteur: Sordel Genre: Sirventes Numero: XXI

Puois trobat ai qi conois et enten

I	1	Puois trobat ai qi conois et enten
		e sap triar los neisis del[s] senatç,
		e conoiser malesa e bontatç,
		ieu non sai doncs qe m’anes als qeren,
	5	per qe mos cor[s] en demorar s’atura
		a Tolosa al mens un mes o dos,
		e per amor dels valens conpagnos
		un sirventes metrai en escriptura.
II		Lo sirventes a tal intendimen:
	10	qu’aissi co stai mal al pro paupretatç,
		si estai mal al croi ric la rictaç;
		q’amdui traion greu pena e greu turmen,
		et non sai dir cal[s] a maior rancura;
		qe·l pros paubres no pot viure gioios,
	15	e·l ric[s] croi[s] viu maritç e consiros:
		abdui vivon ab gran desaventura.
III		Vida non es, antç es mortç veramentç,
		car ben es mortç cui fagll gioi[s] e solatç;
		e cui sofragn tut so qe al cor platç,
	20	trai pietç de mort, car viu a marimen.
		Per so mi par qe fos ben e dretura
		qe·l trop[s] del ric malvas e nuaillos
		fos mes al pauc del valen sofrachos,
		qe·l paucs e·l trops l’un e l’autre pegura.
IV	25	Mas una ren vos vogll far entenden,
		segon q’ieu cre q’es raisons e vertatç:
		c’anc non fon ricx per aver homs malvatç,
		ni·l pros paupres per pauc aur ni argen;
		qe·il pros, cant a d’aver maior fraitura,
	30	miel[tç] po[t] mostrar con es valens e bos,
		e·l ric[s] malvais, can plus es poderos,
		pot om provar mieltç sa flacha natura.
V		Tuc trop son mal, so auc dir a la gen,
		e mal tut pauc, s’a drec o raisonatç;
	35	si com per trop es om desmesuratç,
		es per pa[u]c vils e tornatç, e nien;
		et de so qu’es nïen[tç] non a om cura,
		e so q’es trop non vol Dieus ni raisos:
		doncs fora ops q’entre·l pauc e·l trop fos
	40	una vertutç c’om apela mesura.
VI		Valer pot ben qi de valor a cura,
		paupres o ricx, sol qe·l cors sia pros:
		qe ses aver nascet cascus de nos
		e ses aver serem de verms pastura.