Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,006 Auteur: Sordel Genre: Deux coblas avec tornada Numero: XXXVI

Del cavaler me plai, qe per amor

I	1	Del cavaler me plai, qe per amor
		moric l’autrer en Flandres, car ll’aman
		en seran trop miellz crezut derenan
		per las dompnas qe·ls tenon en error.
	5	Ben volgra fos ab lui morta s’amia,
		pois gascuna cho qe no cre creiria,
		qe on plus fan los fins amanz languir,
		plus van tarzan zo qe degran complir.
II		[P]er dreit pod om apelar fals’Amor,
	10	car n’auçis un ses un’, al meu semblan;
		car per nuill mal tan adreit non estan
		dui mort ensems cum per scela dolor:
		et esteran, se ad Amor plazia,
		mell viu jauzen; mas, pois plai qe·ls auzia,
	15	ad Amor prec no voilla un sol auzir,
		qe·l vius trai peiz no fai l’autr’al morir.
III		Per qe prec lei, qe pod longar ma via,
		qe·m socorr’anz qe·l mals d’amor m’auzia;
		qe, se·l socors no·m ven anz del morir,
	20	a mon dan get lei e son repentir.