Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Notice Bibliographique
* Vocabulaire

* Présentation
* Bibliographie
* Témoignage
* Appareil critique
* Notes
* Traductions
* Images

Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 266,007 Auteur: Joan Esteve Genre: Pastorela Numero: XV

L'autrier, el gay temps de Pascor (1275)

I   L'autrier, el gay temps de Pascor,
    Quant auzi·ls auzelhetz chantar,
    Per gaug que·m venc de la verdor
    M'en yssi totz sols delechar;
  5 Et en un pradet, culhen flor,
    Encontrey pastora ses par,
    Cuend'e plazen,
    Mot covinen,
    Anhels seguen,
  10 La flor culhen.
    Dizia
    Qu'anc dia
    De far amic non ac talen,
    Quar via
  15 S'en cria
    Don malvestatz pren nayssemen.
     
II   Saludiey la, quar a gensor
    No cre qu'om vis anhels gardar,
    Et elha mi, don ac paor,
  20 Quar no·m vi, tro m'auzi parlar;
    E dis: — « Senher, no m'a sabor
    Quar etz aissi faitz vostr' anar.
    Pecx etz de sen,
    Non per joven
  25 A Dieu mi ren!
    Qu'anatz queren?
    Parria
    Qu'espia
    Fossetz de qualque folha gen,
  30 O·us guia
    Falsia
    Del fals plazer qu'Amors desmen. »
     
III   — « Greu pot hom jutjar per semblan,
    Toza, fi·m yeu, senes falhir;
  35 Quar mant bo ten hom per truan,
    E mant malvat vey mout grazir,
    Per que·us prec d'ayssi enan
    Vulhalz, ans que parletz, auzir!
    Que ieu non so
  40 Sers d'ochaizo;
    Mas, si·us sap bo,
    M'amor vos do ».
    — « Trobada
    Pus fada
  45 Vos agr'ops, Senher, acsetz.
    M'agrada.
    L'estrada
    Seguetz, anatz, faitz vostre pro! »
     
IV   — « Toza, fi·m yeu, ans que m'en an,
  50 Vos faray lo dous joc sentir
    Qu'entre amigua et aman
    Se fai; mar ges no·us vuelh aunir.
    Tan mi platz vostra beutatz gran
    Qu'estiers de vos no·m vuelh partir».
  55 — « Qui·m mou tenso
    D'aital razo
    No sap qui·m so,
    Senher, ni co
    Irada,
  60 Torbada,
    M'en fes l'autrier un folh cusso!
    Mainada
    Blasmada
    No vuelh e mi aja parsso ».
     
V 65 — « Toza cuenhta, tal que·m vejatz,
    Be·us valrai yeu mais que pus belh,
    Que d'aver suy rics e bastatz,
    E far vos n'ai part, cors yrnelh!
    Perque·us prec que m'amor vulhatz
  70 E fassam lo dous joc novelh,
    Ins el jardi,
    Lai sotz selh pi,
    Que mais ses fi
    Valretz per mi ».
  75 — « Ma pensa
    No·s gensa,
    Senher, al vostre pro; quar si
    Entensa
    Ses tensa
  80 Acsetz, tengratz vostre cami ».
     
VI   — « Na Toza, si vos sabiatz
    Can gent vas Amor mi capdelh,
    Cre que de las flors que portatz
    M'en fessetz leumen un capelh.
  85 Mantenen, menan gran solatz,
    Intrem no·n sotz un arborelh ».
    Don s'esjauzi,
    Quar son pretz fi
    Non l’esvazi,
  90 E dis aissi:
    « M'agensa
    Que·m vensa,
    Senher, vostr'amor ses tot si.
    Plazens', a
  95 Parvensa,
    M'avetz. Ab aitam fezem fi! »
     
VII   Suffrensa,
    Valensa
    A·N Guillem de Lodev' ab si;
  100 Qu'ofensa
    No·s pensa
    Mar al Belh-Rai qu'am mais de mi.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI