Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,004 Auteur: Marcabru Genre: Vers Numero: IV

Al prim comens de l'ivernaill

I	1	Al prim comens de l'ivernaill
		Qand plovon del bosc li glandutz,
		Vuoill c'om s'engaill
		De Proeza, que non tressaill,
	5	E que n'esti' amanoïtz
		Aissi cum s'era·l temps herbutz.
II		Ladoncs quecs avols hom se plaing
		Qand ve·l temps frei e las palutz,
		Contra·l regaing,
	10	Que·is avil' e met en bargaing
		Qu'en estiu que non es vestitz
		Pot anar d'una peilla nutz.
III		Aquist fant semblan a tahi
		Al ser quan son plen e pagutz,
	15	Apres lo vi(n),
		E no lor ne soue·l maiti(n),
		Anz jura·l senros acropitz
		C’anc tan lagz temps non fo vehutz.
IV		Joves homes de bel semblan
	20	Vei per Malvestat deceubutz;
		Que van gaban
		Dizo, mil essais encogan :
		« Farem qan lo temps er floritz »,
		Mas lai reman lo gabs e·l brutz.
V	25	Cill ant l'usatge del gosso
		Que ditz qand sera a la lutz
		Fara maio,
		Puois qand es lai qui l'en somo,
		Non er escoutatz ni auzitz,
	30	Anc per lui non fo dolatz fustz.
VI		Moillerat, li meillor del mon
		Foratz, mas chascus vos faitz drutz,
		Que vos confon
		E son acaminat li con
	35	Per qu'es Jovens forabanditz
		E vos en appell'om cornutz.
VII		Lo pretz del dan e del barat,
		De calque part sia vengutz,
		Ant moillerat;
	40	Et ieu ai lo lor autreiat,
		E Jois es entr' els esbauditz
		E Donars alqes mantengutz.
VIII		A tort o a dreig vant dessus
		E Jovens se clama vencutz ;
	45	Li mais e·l plus
		A penas trobo qui·l[s] gratus;
		Capel s'a levat d’avols critz
		Uns per un bou que n'a agutz.