Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,007 Auteur: Marcabru Genre: Vers Numero: VII

Ans que·l terminis verdei

I	1	Ans que·l terminis verdei
		Chantarai et ai ben drei ;
		Qui que d'Amor s'esbaudei,
		Eu no·n ai ni so ni quei.
	5	A nuill home que dompnei
		No quier pejor malavei ;
		Be mor de fam e de frei
		Qui d'Amor es en destrei.
II		Amor no vueill ni dezir,
	10	Tan sap d'engan ab mentir ;
		Per aiso vos ho vueill dir
		C’anc d'Amor no·m puec jauzir.
		Tan l'en vueill mal e l'azir
		Can m'en membra·m fai languir.
	15	Fols fui per Amor servir,
		Mas vengut em al partir.
III		Per Amor sueill esser guais,
		Mas [eu] no·n serai jamais
		C'una·m n'enguanet e·m trais
	20	Per que m'en gurp e m'en lais.
		Ben es cargatz de fol fais
		Qui d'Amor es en pantais.
		Senher Deus quan mala nais
		Qui d'aital foudat se pais !
IV	25	C'Amors es plena d'enguan,
		Per aver se vai camjan,
		E·ls plus pros torn' en soan,
		Que·l malvatz l'aura enan.
		Ja non anetz domnejan
	30	Ses deners et ab afan.
		Amors que vai mercadan
		A diables la coman.
V		D'Amor(s) vos dirai com es :
		Si valiatz un marques
	35	Ja no·us en fasatz cortes,
		Pos d'aver non auretz ges.
		Si n'avetz donat e mes
		No·us er prezat un poges;
		Ja no·us hi valra merces
	40	Pos vos er faillitz l'avers.
VI		Qu'ieu dic als dompnejadors
		Que van d'Amor consiros
		No s'en fasson cobeitos ;
		E poiri' esser lur pros
	45	C'asatz es ben abduros
		Qui d'amar es talantos,
		Que qui trop es amoros
		Ben torna del caul au tros.
VII		La chansoneta rema
	50	No·n dic plus a en Perma ;
		Tal s'en fan d'Amor casla
		Deurion trichar de pla.
		Drutz que·s fai semblar Baza
		Per Amor que fols i fa.
	55	Ja el nos senh ab sa ma
		Cui Amors enguanara !