Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 266,009 Auteur: Joan Esteve Genre: Pastorela religieuse Numero: XVII

Ogan, ab freg que fazia (1288)

I		Ogan, ab freg que fazia,
		En la chalenda d'Abril,
		D'Olargue pel boy venia
		Sols cavalgan, tost e vil;
	5	E vi de pres d'un cortil
		Vaquieyra,
		Ab una vaca sotil
		Et ab so vedelh
		Que gardava;
	10	Et horava
		Mout devotamens,
		E bayssava,
		E levava,
		Co fay contenens.
II	15	Vos lieys tengui dreg, l'estrada
		Laissiey e mon dreg cami.
		Quan me vi·l gen faissonada
		Venir, s'orazo feni;
		Saludiey·l ez elha mi,
	20	La genta,
		E·m senhet e·m benezi,
		Co ssi mort me vis.
		— « Toza cara,
		Que·us fai ara
	25	Si me benezir? »
		— « Senher, car a
		Vostra cara
		Semblan de murir. »
III		— Toza, vos qu'etz plazenteira
	30	No·m digatz mon desplazer,
		Qu'ie·us port amor vertadiera;
		Siatz ab me d'un voler. »
		— « En Dieu ajatz vostr'esper,
		Que vida,
	35	Senher, no·us conosc per ver.
		Membre·us de la mort! »
		— « Toza, gaire,
		Per mon paire,
		Vos no·m conortatz. »
	40	— « Senher fraire,
		A mal aire
		·Us vey, de que·m desplatz. »
IV		— « Vos m'en guerretz leu, Na Toza,
		Si m'autreyatz vostr'amor. »
	45	— « Senher, de Dieu suy espoza,
		Q'ieu no vuelh autre senhor, »
		— « Toz', an vos facha Menor
		Bechina? »
		— « Senher, pel Rey qu'ieu azor,
	50	Non, mais per mon cor
		Vuelh servire,
		Tro·l fenire,
		Aquelh que per nos
		Volc sufrire
	55	Ab martire
		Greu mort en la cros. »
V		— « Quar servir Dieu vos agensa,
		Toza, n'ai gran alegrier. »
		— « Senher, mortz me fai temensa
	60	Q'uey non es vius qui·u fo yer;
		Q'us no sap jorn vertadier
		Ni hora;
		E pert lo dous gaug entier,
		Qui mor en peccat. »
	65	— « Toza gaya,
		A Dieu playa,
		Si quo·l mon soste,
		Que savaya
		Mortz no·ns traya! »
	70	E viriey mon fre.
VI		Con que vaya
		Guilem, gay a
		De Lodev' ab se
		Pretz qu'esmaya
	75	Gen savaya
		E·ls valens mante.
VII		Mon Belh-Ray a
		Ta veraya
		Beutat qu'om non cre,
	80	Sol que l'aya
		Vista, n'aya
		Tan lunh'autra re.