Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 323,004=070,002 Auteur: Peire d'Alvernha , Bernart de Ventadorn Genre: Tenso Numero: II

Amics Bernartz de Ventadorn

I	1	Amics Bernartz de Ventadorn,
		com vos podetz de chant sofrir,
		can aissi auzetz esbaudir
		lo rossinholet noih e jorn ?
	5	auyatz lo joi que demena !
		tota noih chanta sotz la flor.
		melhs s’enten que vos en amor.
II		Peire, lo dormir e·l sojorn
		am mais que·l rossinhol auvir ;
	10	ni ja tan no·m sabriatz dir
		que mais en la folia torn.
		Deu lau, fors sui de chadena,
		e vos e tuih l’autr’ amador
		etz remazut en la folor.
III	15	Bernartz, greu er pros ni cortes
		qui ab amor no·s sap tener ;
		ni ja tan no·us fara doler
		que mais no valha c’autre bes,
		car, si fai mal, pois abena.
	20	greu a om gran be ses dolor ;
		mas ades vens lo jois lo plor.
IV		Peire, si fos dos ans o tres
		lo segles faihz al meu plazer,
		de domnas vos dic eu lo ver :
	25	non foran mais preyadas ges,
		ans sostengran tan greu pena
		qu’elas nos feiran tan d’onor
		c’ans nos prejaran que nos lor.
V		Bernartz, so non es d’avinen
	30	que domnas preyon ; ans cove
		c’om las prec e lor clam merce ;
		et es plus fols, mon escien,
		que cel qui semn’ en l’arena,
		qui las blasma ni lor valor ;
	35	e mon de mal ensenhador.
VI		Peire, mout ai lo cor dolen,
		can d’una faussa me sove,
		que m’a mort, e no sai per que,
		mas car l’amava finamen.
	40	faih ai lonja carantena,
		e sai, si la fezes lonhor,
		ades la trobara pejor.
VII		Bernartz, foudatz vos amena,
		car aissi vos partetz d’amor,
	45	per cui a om pretz e valor.
VIII		Peire, qui ama, desena,
		car las trichairitz entre lor
		an tout joi e pretz e valor.