Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,006 Auteur: Cadenet Genre: Sirventes Numero: II

Aitals cum hieu seria

I	1	Aitals cum hieu seria
		si·l poder n’avia,
		volgra que fos
		qui n’es poderos ;
	5	qu'ieu seria gen tenens
		d’armas e de vestimens,
		e seria larcx conduchiers,
		e seria en cort ufaniers,
		e volria domnas vezer
	10	e soven donar mon aver,
		e seguir guerras e torneys
		et agradar mi a domneys.
II		Aisso·m par que valria
		mais que raubairia,
	15	don vey cobeitos
		totz nostres baros ;
		que si vos es plus manens
		qu’us autres, e vostras gens,
		ajustaran cavalhiers
	20	ab us guarnimens leugiers,
		per plus len cossegre l’aver,
		o, si atrobavo poder,
		per plus leu fugir, so·m pareys ;
		aisso tolh pretz e·l descreys.
III	25	Temps fo qu’om conoyssia
		drutz, quan los vezia,
		a las grans messios
		et als belhs dos
		et als azautz guarnimens
	30	et als belhs aculhimens.
		mas er esser belhs parliers
		val mais qu’aver bos mestiers ;
		mas ab gienh ni ab saber
		no pot hom pretz retener,
	35	si ab faitz no·ls fai o no·ls creys.
		aissi vai aquesta leys.
IV		Nulhs hom per cortezia
		no·s desviaria.
		e si fon sazos
	40	qu’om er’amoros
		e paria jovens,
		e renhava entendemens ;
		mas eras qui vai primiers
		penre los buous e·ls boviers,
	45	dizon que sap mais valer.
		vos, guardatz, s’ilh dizon ver
		qui d’aquelh guazanh mezeis
		porton malazautz arneys.