Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,009 Auteur: Bernart de Ventadorn Genre: Canso Numero: IX

Bel m'es can eu vei la brolha

I	1	Bel m’es can eu vei la brolha
		reverdir per mei lo brolh
		e·lh ram son cubert de folha
		e·l rossinhols sotz lo folh
	5	chanta d’amor, don me dolh ;
		e platz me qued eu m’en dolha,
		ab sol qued amar me volha
		cela qu’eu dezir e volh.
II		Eu la volh can plus s’orgolha
	10	vas me (mas oncas orgolh
		n’ac vas lei ?). per so m’acolha
		ma domna, pois tan l’acolh
		c’a totas autras me tolh
		per lei, cui Deus no me tolha ;
	15	ans li do cor qu’en grat colha
		so que totz jorns s’amor colh.
III		S’amor colh, qui m’enpreizona
		per lei que mala preizo
		me fai, c’ades m’ochaizona
	20	d’aisso don ai ochaizo.
		tort n’a ; mas eu lo·lh perdo ;
		e mos cors li reperdona,
		car tan la sai bel’ e bona
		que tuih li mal m’en son bo.
IV	25	Bo son tuih li mal que·m dona ;
		mas per Deu li quer un do :
		que ma bocha, que jeona,
		d’un douz baizar dejeo.
		mas trop quer gran guizardo
	30	celei que tan guizardona ;
		e can eu l’en arazona,
		ilh me chamja ma razo.
V		Ma razo chamja e vira ;
		mas eu ges de lei no·m vir
	35	mo fi cor, que la dezira
		aitan que tuih mei dezir
		son de lei per cui sospir ;
		e car ela no sospira,
		sai qu’en lei ma mortz se mira,
	40	can sa gran beutat remir.
VI		Ma mort remir, que jauzir
		no·n posc ni no·n sui jauzire ;
		mas eu sui tan bos sofrire
		c’atendre cuit per sofrir.