Appel, Carl. Der Trobador Cadenet. Halle a. S.: Verlag von Max Niemeyer, 1920.

Code: 106,022 Auteur: Cadenet Genre: Canso Numero: XIV

S'ieu pogues una voluntat

I	1	S’ieu pogues ma voluntat
		forsar de segre mon sen,
		greu m’agra Amors tornat
		a faire son mandamen. —
	5	non ! per so c’om ses amor
		non ama ges tant valor
		cum fai fis enamoratz,
		car greu er, si non amatz,
		que ja cuidetz pro ben faire ;
	10	et hom que non es amaire,
		non tem faillir ni·n cuid’esser tengutz
		de tant cum fai entendeires e drutz.
II		Pero si tot m’es honrat
		de servir Amor, e gen.
	15	si torn i ab cor forssat ;
		e non ges per espaven
		contra negun faich d’amor,
		mas totz temps es de seignor
		don no ven acors ni gratz,
	20	c’ades lo serv hom forsatz ;
		e·l seigner c’ades vol traire
		dels sieus e·ls poigna en desfaire,
		non deu esser amatz ni fort volgutz,
		mal sol aitan cum leiautatz adutz.
III	25	Una res m’a aleujat
		alqes de mon pessamen :
		que anc en desleiautat
		non reingnet hom longamen
		ni·n pojet en gran honor,
	30	no·il fenis a desonor.
		et ai vist que leiautatz
		a cregutz moutz et honratz
		mainz homes de bas afaire,
		per q’es fols qui tem mal traire
	35	per si honrar, c’astres es leu vengutz,
		puois deu venir, que ja non er perdutz.
IV		Vers es c’a mi a tardat
		mos astres, que trop ven len ;
		mas greu, tro q’es car comprat,
	40	poj’om en gran honramen,
		que tot so c’om ten meillor,
		es a conqerre pejor,
		e so que pauc val, viatz ;
		mas pois n’es hom plus honratz,
	45	si ben o pot a cap traire,
		que de so que non val gaire ;
		e qan s’ave c’om non o trai a lutz,
		al meinz n’a pretz qui ben s’es captengutz.
V		Dompna, al meinz ai anat
	50	tant vas penre gauzimen
		que no·m pot esser vedat
		q’ieu no·n aja·l cor gauzen.
		quan pens creisser vostr’onor
		e qan vei chastel ni tor
	55	ni ren de lai on reignatz,
		sui de joi rics e sazatz.
		e sabetz que m’es vejaire,
		qan veing vas vostre repaire ?
		totas sazos tro q’a vos sui vengutz,
	60	cuig m’apropche lo luocs don sui mogutz.
VI		Totz hom, pois es lausengaire,
		volria, fos emperaire,
		car si non fos de lausengiers us brutz,
		tals parlera de mi, c’ar n’estai mutz.
VII	65	Taut sap de ben dir’e faire
		la regina de bon aire,
		Elionors, per q’es sos pretz cregutz
		e qi·n ditz ben, vas totas partz crezutz.