Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,015 Auteur: Bernart de Ventadorn Genre: Vers Numero: XV

Chantars no pot gaire valer

I	1	Chantars no pot gaire valer,
		si d’ins dal cor no mou lo chans ;
		ni chans no pot dal cor mover,
		si no i es fin’ amors coraus.
	5	per so es mos chantars chabaus
		qu’en joi d’amor ai et enten
		la boch’ e·ls olhs e·l cor e·l sen.
II		Ja Deus no·m don aquel poder
		que d’amor no·m prenda talans.
	10	si ja re no·n sabi’ aver,
		mas chascun jorn m’en vengues maus,
		totz tems n’aurai bo cor sivaus ;
		e n’ai mout mais de jauzimen,
		car n’ai bo cor, e m’i aten.
III	15	Amor blasmen per no-saber,
		fola gens : mas leis no·n es dans,
		c’amors no·n pot ges dechazer,
		si non es amors comunaus.
		aisso non es amors : aitaus
	20	no·n a mas lo nom e·l parven,
		que re non ama si no pren !
IV		S’eu en volgues dire lo ver,
		eu sai be de cui mon l’enjans :
		d’aquelas c’amon per aver.
	25	e son merchadandas venaus !
		messongers en fos eu e faus !
		vertat en dic vilanamen ;
		e peza me car eu no·n men !
V		En agradar et en voler
	30	es l’amors de dos fis amans.
		nula res no i pot pro tener,
		si·lh voluntatz non es egaus.
		e cel es be fols naturaus
		que de so que vol, la repren
	35	e·lh lauza so que no·lh es gen.
VI		Mout ai be mes mo bon esper,
		cant cela·m mostra bels semblans
		qu’eu plus dezir e volh vezer,
		francha, doussa, fin’ e leiaus,
	40	en cui lo reis seria saus.
		bel’ e conhd’, ab cors covinen,
		m’a faih ric ome de nien.
VII		Re mais no·n am ni sai temer :
		ni ja res no·m seri’ afans,
	45	sol midons vengues a plazer ;
		c’aicel jorns me sembla nadaus
		c’ab sos bels olhs espiritaus
		m’esgard : mas so fai tan len
		c’us sols dias me dura cen !
VIII	50	Lo vers es fis e naturaus
		e bos celui qui be l’enten ;
		e melher es, qui·l joi aten.
IX		Bernartz de Ventadorn l’enten,
		e·l di e·l fai, e·l joi n’aten !