Appel, Carl. Der Trobador Uc Brunec (oder Brunenc). "Abhandlungen Herrn prof. Dr. Adolf Tobler", Halle a. S.: Max Niemeyer, 1895, pp. 45-78.

Code: 450,001 Auteur: Uc Brunet Genre: Canso Numero: I

Ab plazer recep et acuelh

I	1	Ab plazer recep et acuelh
		lo dous temps que colora e penh,
		e no y a ram no s’entressenh
		de blancas flors e de vert fuelh,
	5	e·l colombet pel gaug d’estiu
		mesclon un amoros torney,
		que duy e duy fan lur dompney,
		que par qu’amors baisan los liu.
II		Qui gaug semena, plazer cuelh,
	10	per qu’ieu port guaug, quan vau ni venh,
		e per bon’aventura·m fenh
		ioyos d’amor plus que no suelh,
		quar lai en l’encantada ciu
		menet aventura ·l navey
	15	lo ric Partonopes de Bley
		el gaug Melior, l’agradiu.
III		No y a cor tan serrat d’erguelh
		qu’amors, quan li platz, dins non renh,
		qu’ylh sap ab son cortes engenh
	20	traire ioy de l’aussor capduelh,
		q’uzatges es que dompna esquiu
		so don plus voi qu’om la plaidey,
		e ges per „no” hom no s’esfrey,
		qu’amors asol so qu’ela pliu.
IV	25	Ieu suy selh qu’a celat me muelh,
		qu’oblit so qu’als autres ensenh,
		quar so qu’ieu ai, a re no·m tenh
		e so qu’om mi defen ieu vuelh ;
		qu’amors don’ un cor talentiu
	30	cum selh que iay el malavey,
		que non l’es bo ren qu’om l’autrey,
		mas so ·l platz don hom lo castiu.
V		Quascus ditz que d’amor mi duelh :
		qu’ab dous semblans, vuelh’ o non denh,
	35	pren los uns el·s autres destrenh,
		e cui li platz met en son fuelh. —
		mas qui non lig so qu’ilh escriu,
		pauc sap de l’amoroza ley,
		qu’amors non a ges dig de rey,
	40	que·lh „non” son „oc”, si’s qui·l sen triu.
VI		Dona, per cuy d’autras me tuelh,
		prendetz mi d’un ioy a mantenh ;
		quar nul’ autr’ amor non atenh
		lay on vos mi movetz escuelh ;
	45	que, quan mos huelhs vas vos enviu
		remirar vostre cors adrey,
		tan m’es plazen tot so que i vey
		qu’ab mon grat tostemps vos veyriu.
VII		Que tan vos cobeiton mey huelh
	50	que de tot alre·m desovenh,
		que·l cor en autre loc non tenh,
		qu’ab me·s n’irays, quan m’en destuelh
		ni·m vir alhors, aisso·us autriu ;
		et es razos, al mieu endrey,
	55	a sofrir qu’om ab sen guerrey,
		que ab son cor iratz n’estiu.