Appel, Carl. Der Trobador Uc Brunec (oder Brunenc). "Abhandlungen Herrn prof. Dr. Adolf Tobler", Halle a. S.: Max Niemeyer, 1895, pp. 45-78.

Code: 450,003 Auteur: Uc Brunet Genre: Sirventes Numero: III

Cuendas razos novelhas e plazens

I	1	Cuendas razos novelhas e plazens
		comtem hueymais et aiam bel solatz,
		e gardem nos d’enuegz e de foudatz
		e recobrem cortezias e sens,
	5	qar la foudatz sec dan totas sazos
		e senz cortes gaugz et honors e pros.
II		Ab los ioyos deu hom esser iauzens
		e gen parlans entrels enrazonatz,
		qu’atretan son de bos motz, si·ls sercatz,
	10	cum de foudatz ni de descausimens,
		e gens parlars ab avinent respos
		adutz amicx e non creys messios.
III		Mas d’una ren m’es vengutz pessamens :
		que fara ioys, si cantars l’es emblatz ?
	15	ni a que er cors benamans triatz,
		si hom non es plus cantans e rizens ?
		per us o dic embroncatz cossiros,
		quays, qu’aver an, si fenhon Salamos.
IV		E qui·us cuiatz que·us sia defendens,
	20	si etz avol, qu’om no·us apel malvatz ?
		que·l temps avetz e·l poders vos es datz,
		e no y vezetz mentre·l lums es ardens.
		gardatz vos hi ! que·l temps es tenebros,
		e no y veyretz, quan lo lums er rescos.
V	25	Quar us perilhs ve sobre totas gens :
		mortz, que destruy los cuendes e·ls presatz,
		per que val mais si faitz que si cuiatz,
		qu’en breu d’ora hi ven alongamens ;
		per o los fagz faitz avinens e bos,
	30	que no·us i noza malvaiza ochaizos.