Appel, Carl. Der Trobador Uc Brunec (oder Brunenc). "Abhandlungen Herrn prof. Dr. Adolf Tobler", Halle a. S.: Max Niemeyer, 1895, pp. 45-78.

Code: 450,006 Auteur: Uc Brunet Genre: Sirventes Numero: V

Lanquan son li rozier vermelh

I	1	Lanquan son li rozier vermelh,
		m’es belh quant aug dels auzelhos
		refrims e chans e lays e sos,
		que d’un vers faire m’aparelh,
	5	qu’alre mos cors nom barganha
		mas solatz e cortezia,
		e ia non poiria un dia
		aver ioy qu’en mi remanha.
II		Quar si tot no son miey cabelh
	10	de guay semblant ni d’ergulhos,
		mais val francs e fis e ioyos
		que fals ni trics d’avol trepelh,
		quar adrechamen guazanha
		selh que ioy de bon’ amia
	15	conquer ab leyal paria,
		que l’us de l’autre no·s planha.
III		Ges bona dompna no corelh,
		si·s ten son amic enveyos,
		qu’ab belhs semblans et ab paucx dos
	20	lo pot tener ioyos d’artelh ;
		e si·lh quer mais que no·l tanha,
		ylh renda de belha guia
		al sobredeman fadia,
		per que sos fis pretz no franha.
IV	25	Mas ges de so no·m meravelh,
		si duy desleyal amoros
		falhon per fadas empreizos,
		quan dregz e leys falh del cosselh ;
		quar greu pot falsa mesclanha
	30	lonc temps tener dreita via,
		quar ambas las partz gualia
		l’enguans et met en la fanha.
V		S’om pogues vezer en espelh
		tan be sos ayps cum sas faissos,
	35	aquelh miralhs fora trop bos,
		que·l malvatz viran qual son elh ;
		que tals s’apipa e s’aplanha
		cui malvestatz serr’ e lia,
		qu’aicel miralhs lo faria
	40	plazen, de belha companha.
VI		Mas tant no·m ressit ni·m esvelh
		ni dic a braus motz francs respos
		que sia so qu’ieu volgra fos,
		que·l ric, de cuy son li dentelh,
	45	tenon lo pueg e la planha,
		e qui ves lor se desvia,
		mostron gronh e fellonia,
		cais qu’om do non lur complanha.