Appel, Carl. Der Trobador Uc Brunec (oder Brunenc). "Abhandlungen Herrn prof. Dr. Adolf Tobler", Halle a. S.: Max Niemeyer, 1895, pp. 45-78.

Code: 450,007 Auteur: Uc Brunet Genre: Sirventes Numero: VI

Pus l'adrechs temps ve chantan e rizen

I	1	Pus l’adrechs temps ve chantan e rizen,
		guays e floritz, ioyos, de belh semblan,
		be·l devem tuit aculhir en chantan,
		pus el nos fay de ioy tan bel prezen ;
	5	quo iois nos es donatz per alegrar,
		e qui no l’a, si·l deu far aparer,
		quar de conort naisson ioi e plazer,
		don hom s’enpren ades en son mielhs far.
II		Quar si fos bo so que sol esser gen,
	10	ni agrades so que fon benestan,
		hieu cre que·l temps valgr’ anquer atretan
		cum anc se fes, segon mon escien ;
		mas quecx apren so que degr’ oblidar,
		et oblida so que degra saber,
	15	e levon sus so que degra chazer,
		e baysson ios so que feir’ a levar.
III		Tot aisso fan li ric desconoyssen,
		qu’an mes derrier so qu’anava denan :
		don e condug, ioy e solatz e chan,
	20	e cuion pretz aver per dreit nien.
		ges a razo non o podon portar,
		qu’anc no fo pros nulhs hom ses pro tener,
		ni non ac nom valen senes valer,
		ni bos ses be, ni larcx senes donar.
IV	25	Qu’enaissi an atrastornat ioven
		e gaug e pretz e valor e boban
		que·l guay dompney qu’om tenia entrenan,
		an li pluzor vout en deschauzimen ;
		e pus amors ten vil so qu’es plus car,
	30	non pot a dreg leyal nom retener,
		quar qui despen tot son gaug en un ser,
		pueys de cent iorns no pot tan recobrar ;
V		Qu’ieu vi d’amor que·l gaug e·l ris e·l sen,
		coblas e mot, cordas, anel e guan
	35	solon pagar los amadors un an
		(ar es perdut, mas donan en prenden),
		que sazos fon que·l maior don d’amar
		voli’ hom mais esperar que aver ;
		et eras vey qued az emplit voler
	40	moro·l dezir, que solon dous nafrar.
VI		Per que val mais d’amor so qu’om n’aten
		que·l cochos don desavinen no fan,
		que·l mals n’es bos e plazentier l’afan
		e·l sospir dous e·l maltrag iauzimen ;
	45	e pueys amors non pot longueis anar,
		d’aqui enan torna e non-chaler
		e mudon cor e venon dezesper
		e drutz repren so que sol dezirar.
VII		Dieus sal Rodes, quar ha senhor valen,
	50	larc et ardit, ioven e gent parlan,
		e de donar a trop maior talan
		que de tener non ha selh que o pren,
		qu’ab plazer sap totz sos bels dos daurar ;
		e Dieus do·l en bona via tener,
	55	de força en cor e de cor en poder,
		si que·ls ricx faitz de pretz puesca eritar.
VIII		Senh’ en Guillelm, re no i pot melhurar
		lo plus savis en vostre captener,
		quar gaug de cor e vida de plazer
	60	a qui ab vos pot caber ni renhar.
IX		Vas Anduza vuelh mon vers enviar,
		que talant ai de mon senhor vezer,
		quar ten e creis en pretz et en poder
		e viu ioios e vol valens estar.