Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,016 Auteur: Marcabru Genre: Vers Numero: XVI

D'aisso laus Dieu

I	1	D'aisso laus Dieu
		E saint Andrieu
		C'om non es de major albir
		Qu'ieu sui, so·m cuig,
	5	E no·n fatz bruig
		E volrai vos lo per que dir.
II		C'assatz es lait,
		S'intratz en plait
		Don non sabretz a lutz issir ;
	10	E non es bo
		Digatz razo.
		Si non la sabetz defenir.
III		De gignos sens
		Sui si manens
	15	Que mout sui greus ad escarnir,
		Lo pan del fol
		Caudet e mol
		Manduc e lais lo mieu frezir.
IV		Tant quant li dur,
	20	Li pliu e·il jur
		C'om no·m puosca de lui partir ;
		E quan li faill
		Mus e badaill
		E prenda del mieu lo dezir...
V	25	Qu'ieu jutg'a drei
		Que fols follei
		E'l savis si gart al partir ;
		Qu'a dobl'es fatz
		E dessenatz
	30	Qui·s laiss'a fol enfolletir.
VI		D'estoc breto
		Ni de basto
		No sab om plus ni d'escrimir;
		Qu'ieu fier autrui
	35	E·m gart de lui
		E no·is sap del mieu colp cobrir.
VII		En l’autrui broill
		Chatz cora·m voill
		E·i fatz mos dos canetz glatir ;
	40	E·l tertz s'ahus
		Eis de rahus
		Bautz et aficatz per ferir.
VIII		Mos alos es
		En tal deves
	45	Res mas ieu non s'en pot jauzir,
		Aissi l'ai claus
		De pens navaus
		Que nuills no lo·m pot envazir.
IX		De pluzors sens
	50	Sui ples e prens
		De cent colors per mieills chauzir ;
		Fog porti sai
		Et aigua lai,
		Ab que sai la flam' escantir.
X	55	Cascuns si gart,
		C'ab aital art
		M'er a viure o a morir;
		Qu'ieu sui l'auzels
		C'als estornels
	60	Fatz los mieus auzellos noirir.