Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,026 Auteur: Bernart de Ventadorn Genre: Vers Numero: XXVI

Lancan vei per mei la landa

I	1	Lancan vei per mei la landa
		dels arbres chazer la folha,
		ans que·lh frejura s’espanda
		ni·l gens termini s’esconda,
	5	m’es bel que si’ auzitz mos chans,
		qu’estat n’aurai mais de dos ans,
		e cove que·n fass’ esmenda.
II		Mout m’es greu que ja reblanda
		celeis que vas me s’orgolha,
	10	car si mos cors re·lh demanda,
		no·lh platz que mot m’i responda.
		be m’auci mos nescis talans,
		car sec d’amor los bels semblans
		e no ve c’amors lh’atenda.
III	15	Tan sap d’engenh e de ganda
		c’ades cuit c’amar me volha.
		be doussamen me truanda,
		c’ab bel semblan me cofonda !
		domna, so no·us es nuls enans,
	20	que be cre qu’es vostres lo dans,
		cossi que vostr’om mal prenda.
IV		Deus, que tot lo mon garanda,
		li met’ en cor que m’acolha,
		c’a me no te pro vianda
	25	ni negus bes no·m aonda.
		tan sui vas la bela doptans,
		per qu’e·m ren a leis merceyans :
		si·lh platz, que·m don o que·m venda !
V		Mal o fara, si no·m manda
	30	venir lai on se despolha,
		qu’eu sia per sa comanda
		pres del leih, josta l’esponda,
		e·lh traya·ls sotlars be chaussans,
		a genolhs et umilians,
	35	si·lh platz que sos pes me tenda.
VI		Faihz es lo vers tot a randa,
		si que motz no·i deschapdolha,
		outra la terra normanda,
		part la fera mar prionda ;
	40	e si·m sui de midons lonhans,
		vas se·m tira com azimans
		la bela cui Deus defenda.
VII		Si·l reis engles e·l ducs normans
		o vol, eu la veirai abans
	45	que l’iverns nos sobreprenda.
VIII		Pel rei sui engles e normans.
		e si no fos Mos Azimans,
		restera tro part calenda.