Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,019 Auteur: Marcabru Genre: Vers Numero: XIX

Doas cuidas ai compaignier

I	1	Doas cuidas ai compaignier
		Que·m donon joi e destorbier,
		Per la bona cuida m'esjau
		E per l'avol sui aburzitz ;
	5	D'aital cuidar
		Doutz et amar
		Es totz lo segles replenitz,
		Si qu'ieu for' ab los esmaïtz
		Si tant no saubes ben e mau.
II	10	En dos cuidars ai conssirier
		A triar lo frait de l'entier,
		Be·l teing per devin naturau
		Qui de cuit conoisser es guitz ;
		De fol cuidar
	15	No·m sai gardar,
		Que s'ieu cuich esser de bon fiz
		E·l fols m'en bruig long los auzitz,
		E·m tornara(n) d'amon d'avau.
III		La uostra cuida, soudadier,
	20	Fai eluschar los bals Gaifier
		Qu'envis si balans' enegau
		La cuid’e·l prometres faillitz ;
		Nostre cuidar
		Fai desviar
	25	Lo mon[s] don issic la soritz,
		C'aissi vei los rics sordezitz,
		C'un pro contra donar non au.
IV		Ai! fo natz e bateiatz ier
		Cil qui·m cuiet far enconbrier
	30	Als vezis man que jes no·l lau
		Can cuia contrafar soritz,
		Que per cuidar
		Cuich esser bar
		La cuid'es long' e·l faitz blasitz,
	35	Car de folla cuid' e[i]s fols critz,
		Leu notz a presen et a frau.
V		Cuiador d'amor volatgier
		Son de folla cuida mainier,
		Qu'en mil no·n trob una corau
	40	D'aqestas amors cuidairitz,
		Pero cuidar
		Non dei blasmar
		Del lot, que Jovens for' aunitz ;
		Si cuiars d'Amor fos oblitz
	45	Jois fora tombatz en canau.
VI		Moillerat cuidan volontier
		E seguentre·l vin e·l sabrier
		Mouta folla cuida esgau,
		Per que·l segles deven mestitz ;
	50	Tals vol cuidar
		En bona part,
		Non enten que Marcabrus ditz
		Que femnas et enfans petitz
		Ant una menda comunau.
VII	55	Dompnas follas de fol mestier
		Son per cuit e fol cavallier,
		Paubr' orgoillos de cuida brau
		Acolza Dieus acaitivitz !
		C’anc per cuidar
	60	Non vim granar
		La cima plus que la razitz ;
		Qu'en bona cuid'es hom peritz
		Si mieiller obra no·i abau.
VIII		Cuidan s'en van lo tort sentier
	65	Siulan tavan per esparvier
		E laisson la dreita carrau
		Per lo conseill dels garaignitz
		Que fant cuidar
		Al ric avar
	70	So don Jovens es marchezitz,
		E Jois es entre·ls francs faillitz,
		Tornatz de Basan en Bertau.