Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,024 Auteur: Marcabru Genre: Vers Numero: XXIV

En abriu, s'esclairo·il riu contra·l Pascor

I	1	En abriu, s'esclairo·il riu contra·l Pascor,
		E per lo bruoill naisso·il fuoill sobre la flor ;
		Bellamen, ab solatz gen, e·m conort de fin' Amor.
II		Qui a drut reconogut d'una color
	5	Blanc lo teigna, puois lo deigna ses brunor ;
		C'amors vair' al mieu veiair' a l'usatge trahidor.
III		Denan vos fara semblan bon per meillor,
		Per servir gen, a talen mal per pejor ;
		Vers es, per ben fait, cap frait e mainz laisitz per honor.
IV	10	Dieus maldiga amor piga e sa valor ;
		Per sa lecha pren delech' al bevedor,
		Qui trop beu plus que non deu lo vins li tol la vigor.
V		Si l'amia non crezi' enganador
		Lauzengier ni mal parlier acusador,
	15	Sieus seria, si·m volia, ses bauzi' e ses error.
VI		Puois qu'ieu vei qu'ella non crei castiador,
		Anz de totz malvatz pren patz, cals la groissor
		A la den torna soven la leng' on sent la dolor.
VII		Denan mei n'i passon trei al passador,
	20	Non sai mot tro·l quartz la fot e·l quinz lai cor.
		Enaissi torn' a decli l'amors e torn' en negror.
VIII		Aquist con son deziron e raubador,
		Tuit cill gartz i clamon partz et ill en lor,
		E qui mieills fa sordeitz a, cum de l'agnel an pastor.
IX	25	A dur auzel tol la pel cel qui escorja voutor.