Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,025 Auteur: Marcabru Genre: Vers Numero: XXV

Estornel, cueill ta volada

I	1	Estornel, cueill ta volada :
		Deman, ab la matinada,
		Iras m'en un' encontrada,
		On cugei aver amia ;
	5	Trobaras
		E veiras
		Per que vas ;
		Comtar l'as
		E·ill diras
	10	En eis pas
		Per que se traslia.
II		No sai s'aissi·s fo fadada
		Que no m'am e si' amada ;
		C'ab una sola vegada
	15	Fora grans la matinia,
		Si·ll plagues
		Ni volgues
		Qu'o fezes ;
		Per un mes
	20	N'agra tres,
		Aqui es
		De sa companhia.
III		Ai ! com es encabalada
		La falsa razos daurada,
	25	Denan totas vai triada ;
		Va ! ben es fols qui s'i fia,
		De sos datz
		C'a plombatz
		Vos gardatz,
	30	Qu'enganatz
		N'a assatz,
		So sapchatz,
		E mes en la via.
IV		Per semblant es veziada,
	35	Plus que veilla volps cassada ;
		L'autrier mi fetz far la bada
		Tota nueg entruesc' al dia.
		Sos talans
		Es volans
	40	Ab enguans ;
		Mas us chans
		Fa·n enfans
		Castians
		De lor felonia.
V	45	Selui fadet gentils fada
		A cui fo s'amors donada ;
		No fo tals crestianada
		De sai lo peiron Elia ;
		Vol' e vai
	50	Tot dreit lai,
		E·l retrai
		Qu'ieu morrai,
		Si no sai
		Consi jai
	55	Nuda o vestia.
VI		De fin' amor dezirada
		Az una flor pic vairada
		Plus que d'autruna pauzada.
		Paucs fols fai tost gran folia.
	60	Perdo·l grat
		De l'abat
		Saint Privat ;
		M'ai pensat
		Ses cujat
	65	Si·m ditz : mat,
		Que l'amors embria.
VII		De fin' amor dezirada
		Az una flor pic vairada
		Plus que d'autruna pauzada.
	70	Paucs fols fai tost gran folia.
		Perdo·l grat
		De l'abat
		Saint Privat ;
		M'ai pensat
	75	Ses cujat
		Si·m ditz : mat,
		Que l'amors embria.
VIII		Del deslei
		Que me fei
	80	Li fauc drei,
		E·il m'autrei,
		Mas sotz mei
		Aplat sei,
		Qu'ela·m lass' e·m lia.