Ernst, Willy. Die Lieder des provenzalischen Trobadors Guiraut von Calanso. "Romanische Forschungen", 44, 2 (1930), pp. 255-406.

Code: 243,008a Auteur: Guiraut de Calanson Genre: Canso Numero: I

Los grieus dezirs que·m solon far doler

I	1	Los grieus dezirs que·m solon far doler
		Ai oblidatz, dompna ric’ e valens,
		Qu’enaissi m’es camjatz lo cors e·l sens
		Que res no vuelh mas sol vostre voler,
	5	E·ls mals d’amor que·m solon far languir
		Pres de la mort, quant ieu amav’ alhor,
		Mi fai semblar ab joi plazen doussor,
		Si quo·l solelhs fai la neu devenir
		Aiga doussa, tant es dous sos resplandres.
II	10	Tot atresi com re no pot valer
		Fuecs ni clartatz ni estela luzens
		Contra·l solelh, m’es autres jois niens
		Contra·l vostre, qu’el mon non puesc vezer
		Neguna res, lai on pus m’o cossir,
	15	Que de beutat, de pretz ni de valor
		Ni de bos faitz, que·s tanhan a ricor,
		Que sol apres de vos puesca venir
		De la gran mar tro lai on cor Menandres.
III		„Belhs Diamans” devetz be nom aver,
	20	Qu’aissi cum es bels dias resplandens
		Clartatz del mon, dompn’, etz vos onramens
		D’autras dompnas, don deu om retener
		Vostres rics faitz de vezer e d’auzir ;
		Et atressi cum en un mirador
	25	Vezon li uelh manta belha color,
		Pot om en vos tot autre ben chausir,
		Per que·m plai mout lo lauzars e l’espandres.
IV		E vos, dompna, avetz tant de saber
		E valetz tant que ben etz conoissens
	30	Que lai on plus val beutatz e jovens,
		Don valon mais li do e li plazer ;
		E tug li pros, que·s volon far grazir,
		Fan lurs belhs dos lai on pus an sabor ;
		E breus respos es loncs jois en amor,
	35	Per que dompna non deu son joi fenir,
		Cum fes Elis, la comtessa de Flandres.
V		Mas vos avetz en mi tan de poder
		Que mil tans pus me seria plazens
		Mort a sufrir que fos de ren jauzens
	40	Qu’a vos fos grieus, si sabia per ver
		Que tot lo mon agues al mieu servir ;
		Qu’ab vostres digz belhs e de gran onor
		Avetz mon cor mes en tan gran ricor
		Que bos pessars m’es, on pus vos dezir,
	45	Jois e repaus e sojorns e remandres.
VI		Tezaur e gaug e dompna e senhor
		Fas tot de vos e lais los mals d’alhor,
		Qu’anc non ac pus de son bel conquerir
		Jois ni plazers Sesars ni Alissandres.