Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,026 Auteur: Marcabru Genre: Vers Numero: XXVI

Ges l'estornels non s'oblida

I	1	Ges l'estornels non s'oblida,
		Quant ac la razon auzida,
		C'ans ha sa vida cuillida,
		Del dreg volar no s'alensa.
	5	Tant anet
		E volet
		E seguet
		Lo devet,
		Orguanet,
	10	E trobet,
		A chantar comensa.
II		Sobr' una branca florida
		Lo francx auzels brai e crida ;
		Tant ha sa votz esclarzida,
	15	Qu'ela n'a auzit l'entensa.
		L'us declui,
		Lai s'esdui
		Truesc' a lui.
		« Auzels sui, »
	20	Ditz : — « Per cui
		Fas tal brui
		Ho cal[s] amor[s] tensa? »
III		Di l’estornels : « Part Lerida
		A pros es tan descremida,
	25	C’anc no saup plus de gandida,
		Plena de falsa crezensa.
		Mil amic
		S'en fan ric :
		Per l'abric
	30	Que·us servic,
		Lo meric
		Del chairic
		N'aura ses faillensa. »
IV		— « Auzels, a tort m'a' nvazida;
	35	Mas pos amor no·m ressida,
		Mas qu'ieu no sui sa plevida,
		En cug aver m'entendensa.
		L'autr'am ieu,
		So vueill ieu,
	40	E badi[e]u
		Ses aisi[e]u
		Don m'eschi[e]u
		Tug de bri[e]u,
		Ses far contenensa. »
V	45	Az una part es partida
		Ma fin' amistatz plevida,
		Son joc revit, si·l m'envida.
		Auzels, per ta conoisensa,
		So·l diguatz
	50	Qu'en un glatz
		Lev' e jatz,
		Desiratz
		Er l'abatz
		Ans asatz
	55	Que n'ajam lezensa.
VI		La cambr'er de cel guarnida,
		D'un ric jauzir per jauzida,
		C'ab dous baizar s'es sentida
		Desotz se plat de plazensa.
	60	Vai e·l di
		Qu'el mati
		Si·aisi,
		Que sotz pi
		Farem fi,
	65	Sotz lui mi,
		D'esta malvolensa. »
VII		Gent ha la razon fenida,
		Estornels cui l'aura guida
		[Vas] son senhor, com qu'estia ;
	70	« Vos ai amor de valensa.
		C’als mil drutz
		Ha rendutz
		Mil salutz
		E pagutz
	75	Per condutz
		Ses traütz
		De falsa semensa. »
VIII		S'al mati
		L'es aqui
	80	On vos di
		E·us mandi,
		Qu'el ardi
		Del jardi
		E que·us mat e·us vensa !