Ernst, Willy. Die Lieder des provenzalischen Trobadors Guiraut von Calanso. "Romanische Forschungen", 44, 2 (1930), pp. 255-406.

Code: 243,009 Auteur: Guiraut de Calanson Genre: Canso Numero: IV

Si tot l'aura s'es amara

I	1	Si tot l’aura s’es amara,
		Don s’esclarzisson li branc,
		Ges per aisso no·m estanc
		D’un vers far en bella rima,
	5	Per que sapchon li pluzor
		Qu’ieu no vei bon trobador
		Qu’ab mi no pogues apendre.
II		E pois quascus dezampara
		Vers per chanso, ieu no·m planc
	10	Lo dan que·l corr sobr’ el flanc
		E·l genh e l’art e l’escrima ;
		Mas l’us vol qu’om chant d’amor,
		L’autre vol motz de folhor,
		L’autre leu vers per entendre,
III	15	Per que belha razos cara
		Se pert, que·l clop e li ranc
		E·l gartz qu’estai sotz lo banc,
		Qu’apres los autres razima,
		Trobon e son chantador ;
	20	E·lh malvat entendedor
		Lauzon so qu’om deu mespendre.
IV		E quar om razo non gara,
		Ab mains digz cars me remanc ;
		Quar so vei chazer el fanc
	25	Que degr’ aut estar el sima.
		E calon s’en li melhor ;
		Tan son pauc li valedor,
		Qu’om no pot ab totz contendre.
V		Mas una flors blanch’ e clara
	30	Mi te alques mon cor franc,
		E s’enas no·m vol, tot blanc
		M’aura cum en l’ora prima ;
		Mas si·m breuges ma dolor,
		Be tengra·l joi per melhor,
	35	Quar mais val donar que vendre.
VI		Mas sa belha francha cara
		No vei, per que no·m refranc
		De·l greu mal don me complanc
		Qu’ins el cor m’intra e·m lima.
	40	A lei de fin amador
		Dezir so don soven plor,
		Qu’en als no m·en puesc enpendre.
VII		E pero si no·m ampara
		Non dei d’als pensar, ni anc
	45	Ni es ni er ni fo anc
		Autra per que ja·s refrima
		Mon cor qu’ieu ja·l vir alhor,
		Qu’a lei de bon jogador
		Vuelh tot en un luec despendre.
VIII	50	De·l bon rei fauc ma lauzor
		D’Arago, quar ab onor
		Sap tot, quant elh fai, despendre.