Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,031 Auteur: Marcabru Genre: Vers Numero: XXXI

L'iverns vai e·l temps s'aizina

I	1	L'iverns vai e·l temps s'aizina
		E reverdej' il boisso,
		E par la flors en l'espina
		Don s'esjauzen l'auzello :
	5	Ai!
		Ja deven hom d'amor gai,
		Chascus vas sa par s'atrai,
		Hoc,
		Segon plazenssa corina.
II	10	Lo freitz frim e la bruina
		Contra la gentil sazo ;
		Pels plais e per la gaudina
		Aug del chan la contensso ;
		Ai !
	15	Ieu·m met de trobar en plai,
		E dirai d'amor cum vai,
		Hoc,
		Si·m vuoill e cum revolina.
III		Amars creis et atahina
	20	Tric' ab coratje gloto
		Per una dolssor conina
		Que·is compren d'un fuoc fello ;
		Ai !
		Ja non er nuills s'i dechai
	25	D'averas o per assai ;
		Hoc,
		No·i lais del pel en l'arsina.
IV		Bon' Amors porta meizina
		Per garir son compaigno,
	30	Amars lo sieu disciplina
		E·l met en perdicio ;
		Ai !
		Tant cant l'avers dura, sai,
		Al fol, semblan d'amor fai,
	35	Hoc,
		E quan l'avers faill buzina.
V		Gent cembel fai que trahina
		Ves son agach lo brico,
		Del cim tro qu'en la racina,
	40	Entrebescat hoc e no ;
		Ai !
		Tal amei blanc brun e bai
		Ab si farai no farai ?
		Hoc,
	45	Fai al fol magra l'esquina.
VI		Dompna non sap d'amor fina
		C'ama girbaut de maiso,
		Sa voluntatz la mastina
		Cum fai lebrieir' ab gosso ;
	50	Ai !
		D'aqui naisso·ill ric savai
		Que no fant conduit ni pai ;
		Hoc,
		Si cum Marcabrus declina.
VII	55	Aquest intr' en la cozina
		Coitar lo fuoc el tizo
		E beu lo fum de la tina
		De si donz na Bonafo ;
		Ai !
	60	Ieu sai cum sojorn' e jai
		E part lo gran e·l balai,
		Hoc,
		Son seignor engirbaudina.
VIII		Qui bon' Amor a vezina
	65	E viu de sa liurazo,
		Honors e Valors l'aclina
		E Pretz sens nuill' ochaio;
		Ai !
		Tant la fai ab dig verai
	70	Que no·il cal aver esmai
		Hoc,
		Del trut dullurut n'Aiglina.
IX		Ja non farai mai plevina
		Ieu per la troba n'Eblo,
	75	Que sentenssa follatina
		Manten encontra razo ;
		Ai !
		Qu'ieu dis e dic e dirai
		Quez amors et amars brai,
	80	Hoc,
		E qui blasm' Amor buzina.