Ernst, Willy. Die Lieder des provenzalischen Trobadors Guiraut von Calanso. "Romanische Forschungen", 44, 2 (1930), pp. 255-406.

Code: 243,002 Auteur: Guiraut de Calanson Genre: Canso Numero: VII

Celeis cui am de cor e de saber

I	1	Celeis (1) cui am de cor e de saber,
		Domn’e seignor et amic, volrai dir
		En ma chanso, si·l platz qu’o deign’ auzir,
		Del menor tertz d’amor son gran poder,
	5	Per so car vens princes, ducs e marques,
		Comtes et reis, e lai on sa cortz es
		Non sec razo mas plana voluntat,
		Ni ja nuil temps noi aura dreit jutjat.
II		Tant es subtils qu’om non la pot vezer,
	10	E corr tan tost que res no·il pot fugir,
		E fer tan dreg que res no·il pot gandir
		Ab dart d’acier, don fai colp de plazer,
		On non ten pro ausbercs fortz ni espes,
		Si lansa dreit ; e pois trai demanes
	15	Sajetas d’aur ab son arc estezat ;
		Pois lans’ un dart de plom gent afilat.
III		Corona d’aur porta per son dever ;
		E no ve re ; mas lai on vol ferir
		No faill nuill temps, tan gen s’en sap aizir ;
	20	E vola leu, e fai si mout temer,
		E nais d’azaut que s’es ab joi empres,
		E quan fai mal, sembla que sia bes,
		E viu de gaug e·s defen e·s combat,
		E noi garda paratge ni rictat.
IV	25	En son palais, on ela vai jazer,
		A cinc portals, e qui·ls dos pot obrir
		Leu passa·ls tres, mas no·n pot leu partir ;
		Et ab gaug viu cel qu’i pot remaner ;
		E poja i om per quatre gras mout les,
	30	Mas noi intra vilans ni mal apres,
		C’ab los fals son el barri albergat,
		Que ten del mon plus de l’una meitat.
V		Fors al peiro, on ela·s vai sezer,
		A un taulier tal co·us sai devezir,
	35	Que negus om no sap nuill joc legi
		Las figuras noi trob a son voler ;
		Et a i mil poinz ; mas gart que noi ades
		Om malazautz, de lait jogar mespres,
		Quar li point son de veire trasgitat,
	40	E qui·n fraing un, pert son joc envidat.
VI		Aitan quan mars ni terra pot tener
		Ni soleils par, se fai a totz servir
		Los us fai rics e·ls autres fai languir,
		Los us ten bas e·ls autres fai valer ;
	45	Pois estrai leu so que gent a promes ;
		E vai nuda mas quan d’un pauc d’orfres
		Que porta ceing ; e tuit sei parentat
		Naisson d’un foc de que son assemblat.
VII		Al segon tertz taing franquez’ e merces,
	50	E·l sobeiras es de tan gran rictat
		Que sobre·l cel eissaussa son regnat.
VIII		A Monpeslier a·N Guillem lo marques
		T’en vai, chanso ; fai l’auzir de bon grat
		Qu’en lui a pretz e valor e rictat !

 

Fußnoten:

1) Ich gebe die Varianten nur an, soweit ich in der Lesung von Damman, Appel oder Bartsch-Koschwitz abweiche. Wegen des vollständigen Variantenapparates verweise ich auf Damman, a. a. O. S. 1–3, und Jeanroy. Jongleurs S. 28–43. (↑)