Ernst, Willy. Die Lieder des provenzalischen Trobadors Guiraut von Calanso. "Romanische Forschungen", 44, 2 (1930), pp. 255-406.

Code: 243,001 Auteur: Guiraut de Calanson Genre: Descort Numero: VIII

Ab la verdura

I	1	Ab la verdura
		Del temps qui meillura
		Per bon’ aventura
		Mi pren ades cura
	5	De joi e d’amor ;
		Car qui·s rancura
		Ni trop mal s’aura,
		Totz temps li pejura ;
		Doncs s’ieu ai ardura
	10	Cobri ma dolor
		E mostr’ el gaug e rescondi lo plor.
		. . . . . . .
		Que·l fassa centura
		Sotz sa vestedura
	15	De mos bratz, mas dura
		M’es del joi meillor,
		Don ai frachura.
		Mas pos m’asegura
		. . . . . . .
	20	Mos cors que s’atura
		Que no·m vir aillor ;
		Car trop es grieu qui perlonga labor
II		Preisan
		Ploran,
	25	Qu’ans a perduda sa vida
		Cercan
		Mudan
		C’autra no·ll es escarida.
		Mas dan
	30	Noi blan
		Car si tot no m’es aizida,
		Pensan
		N’ai tan
		C’autra no m’es encobida.
III	35	E so que·n ai
		Ten mon cor gai,
		Per so car sai
		Qu’el mon non a plus chausida ;
		E doncs, s’il plai,
	40	Tolla·m d’esmai
		Ab joi verai
		E senes tota gandida.
IV		Quar s’eu·m fi
		En sa bella semblansa
	45	Membres li
		Sol de la benenansa ;
		Si m’auci
		Sera desmesuransa ;
		Qu’en aissi
	50	Ai en leis m’esperansa
V		Con pelegri
		Outramari
		Crezon en l’om de perdonansa ;
		Donc se·ls esdi
	55	Anc mala vi
		„Mon Sen” ni sa gaia semblansa ?
VI		Mas non crei mia
		De ma dous’ amia
		Que tan mala sia
	60	Que·m laisses morir,
		C’ab bon seignor se deu om enriquir.
		E s’ieu n’avia
		So que plus volria,
		Ja mais non auria
	65	De mort nuill consir,
		Ni pueis nuill mal no·m poiria avenir ;
		E si·m crezia,
		Ja mais no·m calria
		Faire romaria
	70	Per m’arma guerir,
		Sol que m’aizis so qu’eu plus en desir.
VII		Mas de·l vezer
		Non ai poder
		Soven
	75	Que mon corage·l dia ;
		E qui de ser
		Part son voler
		Fugen,
		Greu cobra pueis el dia ;
	80	Doncs s’ieu·n esper
		Loc de lezer
		Sufren,
		Ma dousa car’ amia,
		Ja pueis doler
	85	Per noncaler
		No·m ren,
		Ni·m fezes, si·us plazia ;
VIII		Car sitot non ai lo dever,
		Con de vos prezatz sia,
	90	Fin’ amor m’ajud’ a valer :
		Per totz jorns me castia
IX		Que no·m vire
		Ni·m n’aïre,
		Car bos sufrire
	95	Es leu gauzire
		Ab le rire
		Prenden,
		S’ieu consire.
		Mais n’attire,
	100	Mi dons, martire
		Ab greu dezire,
		Can remire
		Vezen
X		Vostre cors, que deu·s conquerer.
	105	Car Amors m’o afia,
		Dompn’, ab merce voil remaner
		En vostra seignoria :
		C’unz de comensar ses aver
		En vos creis chascun dia.