Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,033 Auteur: Marcabru Genre: Vers Numero: XXXIII

Lo vers comens quan vei del fau

I	1	Lo vers comens quan vei del fau
		Ses foilla lo cim e·l branquill,
		C'om d'auzel ni raina non au
		Chan ni grondill,
	5	Ni fara jusqu' al temps soau
		Qu·el nais brondill.
II		E segon trobar naturau
		Port la peir' e l'esc' e'l fozill,
		Mas menut trobador bergau
	10	Entrebesquill,
		Mi tornon mon chant en badau
		En fant gratill.
III		Pretz es vengutz d'amont aval
		E casegutz en l’escobill,
	15	Puois avers fai Roma venau,
		Ben cuig que cill
		Non jauziran, qui·n son colpau
		D'aquest perill.
IV		Avoleza porta la clau
	20	E geta Proez' en issill;
		Greu parejaran mais igau
		Paire ni fill;
		Que non aug dir, fors en Peitau,
		C'om s'en atill.
V	25	Li plus d'aquest segle carnau
		Ant tornat joven a nuill,
		Qu'ieu non trob, de que molt m'es mau,
		Qui maestrill
		Cortesia ab cor leiau,
	30	Que noi·s ranquill.
VI		Passat ant lo saut vergondau
		Ab semblan d'usatge captill ;
		Tot cant que donant fant sensau,
		Plen de grondill,
	35	E non prezon blasme ni lau
		Un gran de mill.
VII		Cel prophetizet ben e mau
		Que ditz c'om iri' en becill,
		Seigner sers e sers seignorau,
	40	E si fant ill,
		Que·i ant fait li buzat d'Anjau,
		Cal desmerill.
VIII		Si amars a amic corau,
		Miga nonca m'en meravill
	45	S'il se fai semblar bestiau
		Al departill,
		Greu veiretz ja joc comunau
		Al pelacill.
IX		Marcabrus ditz que noil l'en cau,
	50	Qui quer ben lo vers e·l foïll
		Que no·i pot hom trobar a frau
		Mot de roïll;
		Intrar pot hom de lonc jornau
		En breu doïll.