Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,042 Auteur: Marcabru Genre: Vers Numero: XLII

Quan l'aura doussana bufa

I	1	Quan l'aura doussana bufa,
		E·l gais, desotz lo brondel,
		Fai d'orguoil cogot e bufa
		E son ombriu li ramel;
	5	Ladoncs deuri' hom chausir
		Verai' amor ses mentir
		C'ab son amic non barailla.
II		Jovens triatz non a vida,
		Que ferit l'an dui cairel
	10	Malvestatz e Cobeïda,
		Laïnz entre·l cor e·l fel;
		Et es ne greus ad issir,
		Que no s'en laissa garir
		D'avolez' e de nuailla.
III	15	E·l jelos bada e musa
		E fai badiu badarel,
		Car qui l’autrui con capusa
		Lo sieu tramet al mazel,
		E qui l'estraing vol sentir,
	20	Lo sieu fai enleconir
		E·l met en la comunailla.
IV		Ges non viu de manna dreicha
		Cum fetz lo trips d'Israel,
		Flaira fum qui non s'apreicha,
	25	E·l tornes en bufarel,
		Ni li plus non volon dir
		Vertat, tant volon mentir,
		Per conseill de garsonailla.
V		Laig torn' en ufanaria
	30	Dompneiar ist cornudel,
		Mantenon la drudaria
		E·il tol' e·il vesto·l capel;
		Pois no m'en aus esclarzir
		Ni mon talan ademplir,
	35	An puois co·is pot, Dieus m'en vailla!