Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 133,003 Auteur: Elias Cairel Genre: Canso Numero: -

Estat ai dos ans

		Orthographie nach A.
I	1	Estat ai dos ans
		q’ieu non fis vers ni chansso,
		mas era·m somo
		la fuoilla e·il flors e·l doutz chans
	5	qe·l rossignols fai,
		q’ieu vei sai e lai
		cascun auzel ab sa par
		dompneiar ;
		e pois tot cant es,
	10	s’alegra, ben sui entrepres
		s’ieu non chant e no m’asolatz ;
		pero si·m sui alqes forsatz.
II		La forss’ es tant grans
		q’ieu chan, e jes no·m sap bo ;
	15	e vi tal sazo
		que chantars no m’er’ affans,
		c’avia·l cor gai ;
		mas era non ai
		nuill joi qe’m fass’ alegrar
	20	ni chantar ;
		pero s’ieu pogues
		far la meitat de so q’ieu pes,
		eu baissera las poestatz
		per qe·l segles es deshonratz.
III	25	Desonors e dans
		creis de malvaza razo,
		qe·il princ’ e·il baro
		ant baissat pretz e bobans,
		don valors dechai,
	30	e negun non sai
		per cui puosca redreissar,
		qe·ill avar
		ant tant sobrepres
		totz cels qu’eron larc e cortes,
	35	que ses colp los ant enchaussatz,
		don chascus deu esser blasmatz.
IV		Blasmes et engans
		es, qui porta cor fello
		ab humil faisso
	40	et ab amoros semblans ;
		pero no m’eschai
		q’ieu mi met’ en plai
		de lieis cui soli’ amar,
		q’enganar
	45	l’en vi plus de tres,
		mas er n’a tal chausit e pres
		que n’a mi e·ls autres vengatz,
		cui ella teni’ enchantatz.
V		Chansos, drogomans
	50	seras mon seignor Coino,
		e no·m ochaiso
		car ieu no l’ai vist enans,
		que la gens de sai
		dizen q’el val mai
	55	que negus ; pero be·m par,
		si parlar
		negus en volgues,
		q’ieu lo veirai anz de dos mes ;
		e si ma chanssoneta·il platz,
	60	ma dompn’ Yzabel sia·l gratz.
VI		Nuills hom non pot ben chantar
		sens amar ;
		pero s’ieu agues
		gaia dompna tal qe·m plagues,
	65	jes no sui tant desesperatz
		q’ieu non ames, si fos amatz.