Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 377,006 Auteur: Pons de la Garda Genre: Canso Numero: -

Tant soi apessatz

I	1	Tant soi apessatz
		et en gran esmai,
		que ben cre e sai
		que no·m plagr’ onguan
	5	solatz ni deport ni chan ;
		mas On-tot-mi-platz
		vol qu’ieu chan, et es mi gen
		que fassa son mandamen ;
II		Qu’estiers nuill solatz
	10	ni gran joi non ai,
		que trop peitz me vai
		que no fes antan.
		e s’aisi·m vauc meilluran,
		fora·m meils assatz
	15	que fos mortz ab cor jauzen
		que s’ara viu malamen.
III		Suau et en patz
		viu e meins d’esglai
		sel qui per assai
	20	ama, e non ges tan
		que·n puesca morir aman.
		mas tant enlassatz
		m’i soi ieu joguan rizen
		c’uei mais noi puesc aver sen ;
IV	25	Que las grans beutatz
		e·l cors cueind’ e gai
		e·l ric pretz verai
		e la valor gran
		c’a midons, qu’ieu dupt’ e blan,
	30	m’a mes en tal latz
		don molt dur trebaill aten,
		si no me val chauzimen.
V		Tant hi fui onratz
		que·l covens mi plai
	35	(si tot nom estrai ?)
		que·m fes en baizan.
		del bel mensongier semblan
		es mos cors pagatz,
		c’aisi m’o dis avinen
	40	que ver me par, quan me men.
VI		Mas molt soi iratz
		e marritz d’un plai
		en que·l pro de sai
		avem pres gran dan :
	45	de la comtessa prezan,
		dona de Burlatz,
		que perdem, so m’es parven,
		si Dieus encar no la·ns ren.
VII		Mas nos avem conort gran
	50	e mon Tot-mi-platz,
		que sel qui la ve soven,
		non pot aver marrimen.