Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,003 Auteur: Uc de Sant Circ Genre: Canso Numero: I

Anc enemics q'ieu agues

I	1	Anc enemics q’ieu agues
		Nuill temps no·m tenc tant de dan
		Cum mos cors e miei huoill fan ;
		E s’ieu ai per lor mal pres,
	5	Ill no·i ant faich nuill gazaing ;
		Qe·l cors en sospira e·n plaing
		E·ill huoill en ploron soven,
		Et on cascus pieitz en pren
		Plus volon, qecs, obezir,
	10	Lai don sento·l mal venir.
II		Per que m’agr’ops, s’ieu pogues,
		C’al cor e als huoills, qe·m fan
		Aver de ma mort talan,
		Fugis, mas ieu non puosc ges,
	15	Anz m’atur e m’acompaing
		Ab lor, e fis sers remaing
		A l’adreich gai cors plazen
		Cui ill son obedien,
		E·l vuoill onrar e blandir
	20	E gen lauzar ses mentir.
III		Mas una aital sazos es
		Que li plus leial aman
		E cill q’amon ses engan
		Son soanat e mespres,
	25	Et aicill a cui sofraing
		Tot quant ad amor s’ataing
		Son volgut, e non es gen
		C’amors fasa lui gauzen
		Que non sap los bens grazir
	30	E·ls mals, qan los sent, sofrir.
IV		Mas de mi vol cui ten pres
		Que fassa tot son coman,
		De lieis que no·m vol ni·m blan
		Ni·l platz res c’a mi plagues ;
	35	C’aissi·m pren cum pres Galvaing
		Del bel desastruc estraing,
		A cui l’avenc far coven
		Que fezes son mandamen,
		Et el no·il dec far ni dir
	40	Ren qe·il degues abellir.
V		Ab aital coven enpres
		Sui sieus, que plus no·ill deman,
		Mas cossir e vauc penssan
		Cum ieu sos plazers fezes ;
	45	Qe·l ditz fenis s’am refraing
		Qui dis que braus cors s’afraing
		Qui gen lo serv humilmen ;
		Per q’ieu ges no m’espaven,
		Tant l’ai cor de gen servir,
	50	Q’ella ja·m laisse morir.
VI		Mas pero pieitz de mort es
		Qui vai languen desiran
		E aten e non sap qan
		Li volra valer merces ;
	55	Puois ai pieitz, per qe·m complaing,
		Q’en un jorn fenis e fraing
		So c’om a conquist greumen
		D’Amor, e al mieu parven
		Degra poignar al fenir
	60	Aitan cum al conquerir.
VII		Seign’En Savaric, mout plaing
		Gardacor, car per estaing
		Camjet son aur fin valen,
		E·l clar maragde luzen
	65	Per veir’escur que luzir
		Non pot mais ni resplandir.