Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,004 Auteur: Uc de Sant Circ Genre: Canso Numero: XIV

Anc mais non vi temps ni sazo

I	1	Anc mais non vi temps ni sazo
		Ni nuoich ni jorn ni an ni mes
		Que tant cum er fai mi plagues,
		Ni on tant fezes de mon pro ;
	5	Car sui estortz a mal’ amor
		On Merces valer no·m podia,
		E sui tornatz lai on devia,
		On trob franqesa et honor
		E leial cor d’una color.
II	10	E pois mi donz m’a faich perdo
		Ni mi a pladeiat Merces,
		Si jamais fatz ren q’a lieis pes,
		Ja puois Merces no mi razo ;
		E s’ieu anc jorn amei aillor,
	15	No m’es greu, ni a lieis non sia,
		Qer l’am mil tans qu’ieu non solia,
		Que lai apresi qual follor
		Fai qui·s part de son bon seignor.
III		Ben sai que ges dignes non so
	20	S’ieu mil tans de mal n’agues pres
		Que non ai et totz temps agues
		Faich a mi donz qe·il saubes bo,
		Q’ela·m perdones sa clamor ;
		Mas hom forfaitz, qan s’omelia,
	25	Deu trobar merce, si·s chastia,
		Que li peneden pechador
		An sus el cel lo joi maior.
IV		Ges no·il puosc rendre guizerdo
		Dels jais ni dels gaugz ni dels bes
	30	Que mi donz m’a faitz e promes,
		Mais d’aitan, de sai on eu so,
		Soplei lai on es et ador,
		E puois recort mil vetz lo dia
		Sos digz, sos faitz, sa cortesia
	35	E·ls huoills clars qu’a plens de doussor,
		Qe·m tiron doussamen vas lor.
V		E si tot l’altra falsa fo
		Ni failli vas mi ni mespres,
		D’aqesta non cre q’o fezes ;
	40	Mas car sai c’om tant la somo
		D’amar, eu m’en don gran temor
		C’am aillors e·n ai jelosia ;
		Car cel qui ten en sa baillia
		Castel a maing demandador
	45	Del perdre deu aver paor.
VI		Chanssos, enans que ans aillor,
		A N’Azalais d’Autier ten via,
		Q’ieu voill que sapcha de cal guia
		M’estai ni cum me vai d’amor,
	50	Ni cum eu sui partitz d’error.