Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,008 Auteur: Uc de Sant Circ Genre: Sirventes Numero: XX

Chanzos q'es leus per entendre

I	1	Chanzos q’es leus per entendre
		Et avinenz per chantar,
		Tal qu’om no·n puescha reprendre
		Los motz ni·l chant esmendar,
	5	Et a douz e gai lo son
		E es de bella razon
		Ed avinen per condar,
		Mi plai e la voil lauzar
		A qi la blasm’ e defendre.
II	10	E aicel qe vol reprendre
		Nesun hom del seu trobar,
		Deu premierement aprendre
		Com el puesca razonar
		Per dreig zo qe·n vol razo,
	15	E se·l tortz es sieus o no,
		Si qu’el s’en puesca salvar ;
		Mas no·s fai a chastiar
		Hom fols ne ab lui contendre.
III		Savis hom qe vol emprendre
	20	Null grant faig ni comenzar,
		Deu primeiramen atendre
		Entro que·l veia per clar
		S’el fai sen o faillizo ;
		Qe fols es qi mou tenzo
	25	E non puesca guerreiar,
		Don li convengn’ ad anar
		Per forza s’a merce rendre.
IV		Huei mais n’er ma dolors mendre,
		Car aug caser e baisar
	30	L’orguoyll e·l poder deiscendre
		D’En Aiselin e mermar,
		E tut li sieu dan mi so
		Legretatz mais ce miei pro
		E·l siei gioi mi fan plurar
	35	E·l siei enuoi alegrar
		E di bes lo cor atendre.
V		Mal l’an fait son temps despendre
		Li lag faig que’il a faig far :
		Donnas ardre e enfanz prendre
	40	E piuzellas espadar
		E mainta religio
		Metr’ a fuoc et a carbo
		Don arz so crotz et altar.
		Hai, Deus, com podetz estar
	45	D’aitals fals venjanza prendre ?
VI		Se Dieu e breu de saisos
		De lui non prent vengiasons,
		Mantas giens fara lagnar
		De si e fara cudar
	50	Cil lo voylla en gratz prendre.