Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,042 Auteur: Uc de Sant Circ Genre: Sirventes Numero: XXIII

Un sirventes vuelh far en aquest son d'En Gui

I	1	Un sirventes vuelh far en aquest son d’En Gui,
		Que farai a Faiensa mandar a·N Guillami
		Et al comte Gui Guerra e·N Miquel Morezi
		Et a·N Bernart de Fosc, et a sier Ugoli
	5	Et als autres que son layns, de lor fe fi.
		E sapchan, cum qu’a lor de laintre esti,
		Que·l sens e·l noms e·l pretz e·l laus qu’om de lor di
		Las corona d’onor, sol fassan bona fi.
II		Bona fin deu ben far, e Dieus li deu far be,
	10	Qui franqueza et dreitura e la gleyza mante
		Contra sel que non a en Dieu ni en leis fe,
		Ni vida apres mort ni paradis non cre,
		E dis c’om es niens depueis que pert l’ale ;
		E crueltatz l’a tolta pietat e merce,
	15	Ni tem layda faillida fayre de nulla re,
		E totz bos faitz desonra e bayss’ e descapte.
III		Si·l chapte·l coms Raimons, gart que·n fassa son pro,
		Qu’eu vi que·l papa·l tolc Argens’ et Avinho
		E Nemz’ e Carpentras, Vennasqu’ e Cavalho,
	20	Uzetge e Melguer, Rodes e Boazo,
		Tolzan e Agenes e Caortz e Guordo,
		E·n mori sos coynhatz, lo bons reis d’Arago ;
		E s’el torn’ a la preza per aital ochaizo,
		Encar l’er a portar el man l’autrui falco.
IV	25	Lo falcos, filh de l’aigla, quez es reys dels Frances,
		Sapcha que Fredericx a promes als Engles
		Qu’el lor rendra Bretanha, Anjau et Toarces,
		E Peytau e Sayntonge, Lemotges, Engolmes,
		Toroinn’ e Normandia e Guiana e·l Paes,
	30	E·n venjara Tolzan, Bezers e Carcasses ;
		Doncs bezonha que Fransa mantenha Milanes
		E N’Albaric, que tolc que lay passatz non es.
V		Passatz lai fora ben, s’elh n’agues lo poder,
		Que de ren als non a dezirier ni voler
	35	Mas cum Fransa e la gleyza el pogues decazer,
		E la soa crezensa e sa ley far tener ;
		Don la gleyza e·l reys hi devon pervezer
		Que·ns mandon la crozada e·ns venhan mantener ;
		Et anem lai en Polla lo regne conquerer,
	40	Quar selh qu’en Dieu non cre non deu terra tener.
VI		Ges Flandres ni Savoya no·l devon mantener,
		Tan lor deu de l’elieg de Valensa doler.