Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 460,001=457,014 Auteur: Vescoms de Torena , Uc de Sant Circ Genre: Tenso Numero: XXXV

En vostr' aiz me farai vezer

		A Lo Vescoms de Torena e N’Uc de Saint-Circ, I Nuc de San Circ el seigner coms, D Lo Vescom de Torena.
		(LE VICOMTE.)
I	1	[En vostr’ aiz me farai vezer,
		N’Uc de Saint Circ, anz del pascor,
		Si que·i farai derrocar tor
		Et aut mur e fossat cazer ;
	5	Que trop menon gran bobanssa
		N’Ucs e·n Arnautz, si Dieus mi gar ;
		Mas eu [la] lor farai baissar,
		O non vuoill aver honransa
		Ni portar escut ni lanssa.]
		(UC DE SAINT-CIRC.)
II	10	Seigner, li gap que faitz lo ser
		Vos oblidon el dormidor,
		E ja no conquera valor
		Rics hom, si·l gab non torna en ver ;
		Et ill non an esperanssa
	15	Que sobre lor ausetz passar
		Si·l coms Gui no·us ven ajudar ;
		E s’il ven, faitz li fianssa
		Mais gazaing si vai en Franssa.
		(LE VICOMTE.)
III		[N’Uc, eu ai ben tant de poder
	20	Que, si ja·l coms Guis no·m socor,
		Q’ieu·ls tornarai en tal error
		Que farai los gaps remaner
		D’En Arnaut e la fermanssa
		Qu’el ditz qe sai venrra cassar,
	25	Mas eu puosc ben d’aitan gabar
		Que del dich penrai venganssa
		Tal don totz temps n’er membranssa.
		(UC DE SAINT-CIRC.)
IV		Seigner, nuills hom non pot saber,
		Quan s’aseton doi jogador,
	30	A cal seran li ris ni·l plor
		Tro·ls vei’om del taulier mover ;
		Ni segon la mia esmanssa
		Hom non deu lo dia lauzar
		En troi qu’aven a l’avesprar,
	35	Qe·l maitin vos er semblanssa
		Tals res qe·l ser desenanssa.
		(LE VICOMTE.)
V		[N’Uc, fols fon qui sa·us fetz passar,
		Q’ieu no·us ai ren en cor a dar,
		Ni non cobriretz la panssa
	40	Ab draps q’ieu vos don de Franssa].
		(UC DE SAINT-CIRC).
VI		Seigner, de vos mi puosc lauzar
		Sol roncin m’en laissatz tornar
		Qe·m det mos seigner q’enanssa
		Guibertz de pretz e d’onranssa.