Cluzel, Irénée. Princes et troubadours de la maison royale de Barcelone-Aragon. "Boletín de la Real Academia de Buenas Letras de Barcelona", 27 (1957-1958), pp. 321-373.

Còdi: 325,001 Autor: Peire rei d'Arago Genre: Deux coblas avec réponse Numero: III, 1

Peire Salvagg'en greu pessar

		Mosenher En P[eire] reys d'Arago :
I	1	Peire Salvagg'en greu pessar
		me fan estar,
		dins ma maizo,
		las flors que say volon passar,
	5	senes gardar
		dreg ni razo;
		don prec a sselhs de Carcasses
		e d'Ajanes,
		et als Guascos prec que lor pes
	10	si flors mi fan mermar de ma tenensa:
		mas tals cuja sai gazanhar perdo
		que·l perdos l'er de gran perdecio!
II		E mos neps, que sol flors portar,
		vol cambiar
	15	— don no·m sap bo —
		son senhal, et auzem comtar
		que·s fai nomnar
		rey d'Arago.
		Mas — cuy que plass'o cuy que pes —
	20	los mieus jaques
		si mesclaran ab los tornes,
		e plass'a Dieu que·l plus dreyturiers vensa!
		Qu'ieu ja nulh temps per bocelh de Breto
		no layssarai lo senbal del basto.
III	25	— Si Midons, qu'es ab cors cortes,
		ples de totz bes,
		Salvagge, valer mi volgues,
		e del sieu cors me fes qualque valensa,
		per enemicx no·m calgra garnizo,
	30	ab sol q'ieu vis la sua plazen faisso.