Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Còdi: 249,002=367,001 Autor: Giraut de Salanhac , Peironet Genre: Tenso (Partimen) Numero: IX

D'una razon, Peironet, ay corage

		Tenson de PEIRONET e de GIRAT. (f. 29).
xiiij.
I	1	D’una razon, Peironet, ay corage
		Que vos deman, et es de drudaria ;
		E se d’amor conoisses son uzage,
		Diguas me ver, e gardaus de follia :
	5	Cal manten mielhs amor, a vostre cen,
		Los vueilhs hol cor, de cel que lialmen
		Ama sidons ? De cal queus n’atalen
		Vos venseray, sol la cort lial sia.
II		— Seinher Girart, el mon non a gramage
	10	Qu’ieu non venses en plag per drudaria
		Car los ueilhs son del cor tos tems mesage
		E fan amar cel que non amaria,
		C’amor non a nulha res tan plazent
		Con son los vueilhs vas leys on an enten,
	15	El cor non met alhous son pensamen
		Mais lay hons vuelhs li mostron que dreg sia.
III		— En Peironet, vos mantenes follage,
		Car el non es ges bon ad obs d’amia
		Can la donna es d’amoros estage
	20	E pueis de leis nol soven nueg ni dia ;
		Perque lo cor manten mot mielh joven,
		Qu’el ve(n) de luinh els huelhs pres solamen.
		Per mi ous dic que sïlh que[m] ten jauzen
		Am am fin cor, luenh e pres, hon que sia.
IV	25	— Seinher Girart, tut(z) li ben el da[m]pnage
		Movon per hueilhs, d’amor que c’om vos dia,
		C’az Andrivet meron al cor tal rage
		Qu’en pres la mort per leys quy Dieus maldia !
		Que s’ab los hueilhs non l’esguares tan gen
	30	Ges per son cor non l’amera nien,
		Quel cor non ha nulh autr’ afortimen
		Que am en luoc tro hueilhs mostron la via.
V		— En Peironet, totz homs d’onrat linhage
		Conois quel pietz chauzet en la partia,
	35	Que tut(z) sabon quel cor a seinhorage
		Sobre los hueilhs, et aujas en cal guiza :
		C’amor dels hueilhs non val sel cor non sen,
		E ses los hueilhs pot lo cor francamen
		Amar sella c’anc non vi a prezen,
	40	Si com Jaufre Rudel fetz de s’amia.
VI		— Seinher Girart, sel(s) hueil(s) mi son salvage,
		Jamais ab leys nulha res pro non sia ;
		E sim mostra .j. semblan d’agradage
		Pren mi lo cor el met en sa bailia.
	45	Veus lo poder del cor e l’ardimen,
		Car per los vueilhs amor el cor deissen,
		El(s) hueilh dizon am semblan avinen
		So que lo cor non pot ni auzaria.
VII		A Peirafuoc tramet mon partimen
	50	Hon la bella fai cort d’enseinhamen,
		Car beutat a triat son gay cors jent ;
		Lo milhor tenc per bon, que qu’ela’n dya.
VIII		Et ieu volrai per mi al jugamen
		L’onrat castell de Sinha el valen,
	55	Car lay estay silh que manten joven
		E sabra dir cal razon mays valria.